عدالت نے مریم کی نواز شریف سے ملاقات کی درخواست مسترد کر دی

 

 

 

 

سماعت کے بعد کمرۂ عدالت میں میڈیا سے گفتگو کرتے ہوئے مریم نواز کا کہنا ہے کہ جج صاحب سے اجازت مانگی تھی کہ عدالت سے جیل واپس جاتے ہوئے مجھے ایک گھنٹے کے لیے والد کی عیادت کرنے دی جائے لیکن انہوں نے اجازت نہیں دی۔
میڈیا نمائندوں نے مریم نواز سے استفسار کیا کہ ڈاکٹر عدنان نے ٹویٹ کی تھی کہ آپ کی بھی طبیعت ٹھیک نہیں ہے، جس پر انہوں نے جواب دیا کہ میں ٹھیک ہوں۔
اس سے قبل چوہدری شوگر ملز کیس میں مریم نواز اور یوسف عباس کی پیشی کے موقع پر لاہور کی احتساب عدالت کے اطراف سکیورٹی کے سخت انتظامات کئے گئے تھے، آنے والے تمام راستوں کو کنٹینرز لگا کر بند کیا گیا تھا، ایک اور کیس میں لاہور ہائیکورٹ کے جسٹس علی باقر نجفی کی سربراہی میں2 رکنی بنچ نے مریم نواز کی درخواست پر سماعت کی۔ عدالتی استفسار پر مریم نواز کے وکیل نے بتایا کہ ان کی مؤکلہ کے خلاف چوہدری شوگر ملز کے ذریعے منی لانڈرنگ کا الزام ہے، جن الزامات میں مریم نواز کو گرفتار کیا گیا ہے، وہ نیب کے دائرہ اختیار ہی میں نہیں آتے۔ اس پر نیب کے وکیل نے تفصیلی جواب داخل کرانے کے لئے عدالت سے مہلت طلب کی، جسے 2 رکنی بنچ نے منظور کر لیا، درخواست پر مزید سماعت 30 اکتوبر کو ہوگی۔