خرابی دور، پاکستان بھر میں انٹرنیٹ سروس بحال

اسلام ٹائمز۔ پی ٹی سی ایل نے بتایا ہے کہ پاکستان بھر میں انٹرنیٹ سروس بحال کردی گئی ہے، زیرِ سمندر فائبر اپٹک کیبلز میں فالٹ کو ٹھیک کرلیا گیا ہے۔ جمعرات کی صبح ترجمان پی ٹی سی ایل نے بتایا کہ پاکستان میں انٹرنیٹ سروس مکمل بحال کردی گئی ہے، صارفین کو انٹرنیٹ سروس کے استعمال میں پیدا ہونے والی دشواری پر معذرت خواہ ہیں۔ انہوں نے مزید بتایا کہ ایس ایم ڈبلیو 4 کو صبح 1 بج کر 35 منٹ پر جبکہ آئی ایم ای ڈبلیو ای کو صبح 4 بج کر 13 منٹ پر بحال کیا گیا۔ گذشتہ روز پاکستان ٹیلی کمیونیکیشن کی زیرِ زمین انٹرنیٹ کیبلز میں خرابی کے باعث ملک کے مختلف شہروں میں انٹرنیٹ سروس سست روی کا شکار ہوئی۔ ملک بھر کے ہوائی اڈوں پر پی آئی اے کا چیک اِن سسٹم بھی متاثر ہوا۔