0
Thursday 7 Nov 2019 15:39

کراچی میں بھی جشن عید میلادالنبی (ص) کی تیاریاں عروج پر، فضاء رنگ و نور سے روشن

کراچی میں بھی جشن عید میلادالنبی (ص) کی تیاریاں عروج پر، فضاء رنگ و نور سے روشن
اسلام ٹائمز۔  ملک بھر کی طرح شہر قائد میں بھی جشن عید میلاد النبی (ص) کی تیاریاں عروج پر ہیں، شہر رنگ و نور میں ڈوبا ہوا ہے جبکہ ہر سو درود و سلام کی صدائیں بلند ہو رہی ہیں۔ سرکار دو جہاں محمد مصطفی (ص) کی ولادت با سعادت نے دنیا کی تاریکی کو اپنے نور مجسم سے روشنیوں میں بدل دیا۔ آپ کی ذات گرامی صورت میں اجمل اور سیرت میں اکمل ہے۔ جشن عید میلادالنبی (ص) کے سلسے میں شہر بھر کی مساجد، عمارتوں اور شاہراؤں کو سبز پرچموں اور برقی قمقموں سے سجادیا گیا ہے۔ بڑی عمارتوں پر چراغاں جبکہ کئی بازاروں اور شاہراہوں پر محرابیں اور آرائشی دروازے بھی لگائے گئے ہیں۔ اس موقع پر مختلف مقامات پر خصوصی اجتماعات کا اہتمام کیا گیا۔

اجتماعات سے خطاب کرتے ہوئے علمائے کرام نے کہا کہ عصر حاضر میں نبی کریم (ص) کی تعلیمات پر عمل کرنا راہ نجات ہے، آپ (ص) نے امن و محبت، بھائی چارگی اور احترام انسانیت کا درس دیا اور یہ پیغام رہتی دنیا تک قائم رہے گا۔ علاوہ ازیں سندھ حکومت کی جانب سے بارہ ربیع الاول کے موقع پر صوبے میں سیکیورٹی کے پیش نظر اہم اقدامات کئے گئے ہیں۔ ذرائع کے مطابق صوبے میں 12 ربیع الاول کی سیکیورٹی کے انتظامات مکمل کرلئے گئے ہیں، امکان ہے کہ اس دوران شہر بھر میں موبائل فون سروس بند اور ڈبل سواری پر پابندی ہوگی، اس کے علاوہ اسلحہ کی نمائش پر بھی پابندی ہوگی۔
خبر کا کوڈ : 826096
رائے ارسال کرنا
آپ کا نام

آپکا ایمیل ایڈریس
آپکی رائے

ہماری پیشکش