QR Code

سندھ اسمبلی میں سماعت سے محروم افراد کیلئے ڈرائیونگ لائسنس کا بل منظور

9 Nov 2019 14:40

بل کے تحت سماعت سے محروم افراد کو بعض شرائط کے تحت ڈرائیونگ لائسنس جاری کئے جائیں گے، ایسے افراد کو گاڑی میں مخصوص شیشے لگانے ہوں گے اور وہ اپنی گاڑیوں میں مخصوص ڈیوائس لگائیں گے، خودکار ڈیوائس اور شیشے کے ذریعے سماعت سے محروم ڈرائیورز کو ہارن، ایمبولینس سائرن کے بارے میں خبر ہوسکے گی۔

اسلام ٹائمز۔ سندھ اسمبلی نے پروونشل موٹر وہیکلز (ترمیمی) بل 2019ء متفقہ طور پر منظور کرلیا جس کے تحت سماعت سے محروم افراد بھی ڈرائیونگ لائسنس حاصل کرسکیں گے۔ سندھ اسمبلی نے پروونشل موٹر وہیکلز (ترمیمی) بل 2019ء متفقہ طور پرمنظور کرکے نئی تاریخ رقم کردی، آج ہونے والے اجلاس میں خصوصی افراد کے لئے اشاروں کی زبان میں بات کرنے والی ایک خاتون کو ایوان میں آنے کی خصوصی طور پر اجازت دی گئی، سندھ اسمبلی میں اس بل کی منظوری کے وقت سماعت سے محروم افراد اور ان کی تنظیم کے نمائندہ لوگ بھی مہمانوں کی گیلری میں موجود تھے، جب خصوصی افراد مہمانوں کی گیلری میں پہنچے تو ایوان میں موجود تمام ارکان نے کھڑے ہوکر ان کا استقبال کیا۔ وزیر پارلیمانی امور مکیش چاولہ نے سائن لینگویج کے حامل افرد کو ایوان میں آنے کے لئے ایک تحریک پیش کی تھی جس کی ایوان میں موجود تمام ارکان نے حمایت کی جب کہ مہمانوں کی گیلری میں موجود خصوصی افراد نے تحریک پر شکریہ ادا کیا۔ اشاروں کی زبان میں بات کرنے کے لئے خاتون مہرین کو بلوایا گیا جو اسپیکر کی نشست کے ساتھ کھڑی ہوئیں اور انہوں نے خصوصی افراد کو سندھ اسمبلی کارروائی کے بارے میں شاروں کی زبان میں بتایا۔ وزیر پارلیمانی امور مکیش کمار چاﺅلہ کی درخواست پر وقفہ سوالات کے دوران ایوان کی کارروائی مؤخر کردی گئی، ان کا کہنا تھا کہ آج کے اجلاس میں صرف موٹر وہیکل بل پیش کیا جائے گا جس پر ارکان نے کثرت رائے سے خصوصی افراد کے لئے موٹر وہیکل ایکٹ ترمیمی بل ایوان میں پیش کرنے کی اجازت دے دی۔

بل کے تحت سماعت سے محروم افراد کو بعض شرائط کے تحت ڈرائیونگ لائسنس جاری کئے جائیں گے اور ایسے افراد کو گاڑی میں مخصوص شیشے لگانے ہوں گے اور وہ اپنی گاڑیوں میں مخصوص ڈیوائس لگائیں گے، خودکار ڈیوائس اور شیشے کے ذریعے سماعت سے محروم ڈرائیورز کو ہارن، ایمبولینس سائرن کے بارے میں خبر ہوسکے گی، ہارن، سائرن پر سماعت سے محروم افراد کی گاڑی میں لائٹ سے اطلاع ملے گی، خصوصی افراد کو پہلی مرتبہ ڈرائیونگ لائسنس کا اجرا کیا جائے گا۔ ایوان میں جب بل منظوری کے لئے پیش کیا گیا تو خصوصی افراد سے ڈرائیونگ لائسنس فیس وصول نہ کرنے سے متعلق ترمیم منظور کرلی گئی، قائد حزب اختلاف کی جاب سے یہ ترمیم بھی پیش کی گئی کہ خصوصی افراد کا ڈرائیونگ لائسنس ٹیسٹ لینے والا افرد اشاروں کی زبان جانتا ہوگا ان کی یہ ترمیم اتفاق رائے سے منظور کرلی گئی۔

خبر کا کوڈ: 826439