جشن عید میلادالنبیؐ آخری سانس اور خون کے آخری قطرے تک منائیں گے، صاحبزادہ زبیر

اسلام ٹائمز۔ جمعیت علماء پاکستان (نورانی) و ملی یکجہتی کونسل کے صدر ڈاکٹر صاحبزادہ ابوالخیر محمد زبیر نے کہا ہے کہ حضورﷺ کی حیات طیبہ پر عمل کرکے ہی ملک کو اسلامی فلاحی ریاست بنایا جاسکتا ہے، ملک کی بقاء اور سالمیت کے تحفظ کیلئے ضروری ہے کہ حضورؐ کے نظام کو عمل طور پر نافذ کیا جائے، قوم کے مسائل کا حل نظام مصطفےٰﷺ کے نفاذ سے ہی ممکن ہے، ان خیالات کا اظہار انہوں نے حیدرآباد میں جے یو پی کی مرکزی میلاد ریلی کے آغاز پر تانگہ اسٹینڈ پھلیلی میں پرچم کشائی کی تقریب سے خطاب کرتے ہوئے کیا۔ صاحبزادہ محمد زبیر نے مزید کہا کہ حضورﷺ محسن انسانیت، رحمت للعالمین، نور مجسم بن کر آئے، آپﷺ کی آمد سے کائنات کا ذرہ ذرہ جگمگا اٹھا، آپﷺ کی تشریف آوری کا جشن عاشقان رسولﷺ زندگی کی آخری سانس اور خون کے آخری قطرے تک مناتے رہیں گے۔