راجن پور، پولیس موبائل پر فائرنگ، 5 اہلکار جاں بحق

اسلام ٹائمز۔ پنجاب کے شہر راجن پور میں پولیس موبائل پر نامعلوم مسلح افراد کی فائرنگ کے نتیجے میں 2 پولیس اہلکاروں سمیت 5 اہلکار جاں بحق ہو گئے ہیں۔ واقعہ روجھان کے علاقے عربی ٹبہ میں پیش آیا، جہاں نامعلوم مسلح افراد نے پولیس موبائل کو نشانہ بنایا۔ پولیس موبائل معمول کے گشت پر تھی کہ اس دوران گھات لگائے مسلح افراد نے وین پر گولیاں برسا دیں، جس کے نتیجے میں وین میں سوار 2 پولیس اہلکار موقع پر ہی جاں بحق ہو گئے، جب کہ گولیوں کی زد میں آ کر مزید 3 اہلکار شدید زخمی ہو گئے، جن کو ابتدائی طبی امداد کی غرض سے ہسپتال منتقل کیا گیا مگر وہ جان سے ہاتھ دھو بیٹھے۔ واقعے کی اطلاع ملنے پر پولیس کی بھاری نفری موقع پہ پہنچ گئی۔ پولیس نے علاقے کو گھیرے میں لے کر ملزمان کی تلاش شروع کر دی ہے۔ جائے وقوعہ سے ابتدائی شواہد اکٹھے کیے جا رہے ہیں اور ریسکیو ٹیموں نے امدادی کارروائیاں مکمل کرلی ہیں۔ ریسکیو 1122 کے اہلکاروں نے لاشوں کو ایمبولنس میں ڈال کر مقامی اسپتال منتقل کر دیا ہے جہاں مقتولین کی شناخت کا عمل جاری ہے۔ مقامی پولیس کے اہلکار نے خدشہ ظاہر کیا ہے کہ مذکورہ حملہ فراری بگٹیوں کی جانب سے کیا گیا ہے، جبکہ قتل ہونے والے پانچوں افراد سرکاری اہلکار تھے۔ دو کا تعلق ایلیٹ سے تھا جبکہ تین اہلکار انٹیلی جنس سے تعلق رکھتے تھے۔