اسلام ٹائمز۔ جماعت اسلامی سندھ کے امیر محمد حسین محنتی نے کہا ہے کہ مہنگائی اور معیشت کی ابتر صورتحال دین پر عمل نہ کرنے کی وجہ سے اللہ کا عذاب ہے۔ غزالی ماڈل ہائی اسکول گھوٹکی میں سیرت النبیؐ کے جلسے سے خطاب کرتے ہوئے محمد حسین محنتی نے کہا کہ نبیؐ سے محبت و عقیدت ہر مسلمان کے ایمان کا حصہ ہے، عشق مصطفیٰ (ص) کا تقاضا ہے کہ زندگی کے ہر دائرے میں قرآن و سنت کو نافذ کیا جائے۔ انہوں نے کہا کہ سودی نظام معیشت، آئی ایم ایف کی غلامی اور کمر توڑ مہنگائی نے ملک کو کنگال اور عوام کو بدحال کرکے رکھ دیا ہے۔ اس موقع پر اسکول کے پرنسپل محمد حسن کھوسہ امیر ضلع تشکیل احمد صدیقی نے بھی خطاب کیا۔ صوبائی سیکرٹری اطلاعات مجاہد چنا، ضلعی نائب امیر احمد خان اور مقامی امیر ریاض احمد گڈانی بھی جلسے میں موجود تھے۔