QR Code

قیام امن میں سکیورٹی اداروں کے ساتھ عوام بالخصوص تاجر برادری نے اہم کردار ادا کیا، ڈی جی رینجرز سندھ

15 Nov 2019 18:48

دورہ کے دوران سائٹ ایسوسی ایشن کے ممبران نے ایسوسی ایشن کے اغراض و مقاصد اور کارکردگی کے حوالے سے میجر جنرل عمر احمد بخاری کو آگاہ کرتے ہوئے اس عزم کا اعادہ کیا کہ وہ قانون نافذ کرنے والے اداروں کے شانہ بشانہ جرائم پیشہ عناصر کی سرکوبی میں اپنا کردار ادا کرتے رہیں گے۔

اسلام ٹائمز۔ ڈی جی رینجرز سند ھ میجر جنرل عمر احمد بخاری نے کہا ہے کہ کراچی میں امن و امان کی بحالی اور دہشت گردی کے خاتمے میں قانون نافذ کر نے والے اداروں کے ساتھ ساتھ عوام بالخصوص تاجر برادری نے اہم کردار ادا کیا ہے، اس ضمن میں قانون نافذ کرنے والے ادارے امن و امان کی صورتحال بہتر بنانے بالخصوص اسٹریٹ کرائم کے تدارک کیلئے مؤثر اقدامات کر رہے ہیں۔ یہ بات انہوں نے سائٹ ایسوسی ایشن آف انڈسٹری کراچی کے دورے کے موقع پر ممبران سے خطاب میں کہی۔ سائٹ ایسوسی ایشن کے ممبران نے ایسوسی ایشن کے اغراض و مقاصد اور کارکردگی کے حوالے سے ڈی جی رینجرز کو آگاہ کرتے ہوئے اس عزم کا اعادہ کیا کہ وہ قانون نافذ کرنے والے اداروں کے شانہ بشانہ جرائم پیشہ عناصر کی سرکوبی میں اپنا کردار ادا کرتے رہیں گے۔ ممبران نے رینجرز کی جانب سے شہر میں دہشتگردی کے خاتمے، امن و امان کی بحالی اور تاجر برادری کیلئے کئے گئے سیکیورٹی انتظامات پر اظہار تشکر کرتے ہوئے مکمل تعاون کی یقین دہانی کرائی۔

خبر کا کوڈ: 827572