میانوالی کے جلسے میں عمران نیازی نے این آر او کا اعتراف کرلیا، حافظ حسین احمد

اسلام ٹائمز۔ جمعیت علمائے اسلام کے مرکزی ترجمان سابق سینیٹر سینئر سیاستدان حافظ حسین احمد نے کہا ہے کہ ”میانوالی“ کے جلسہ میں ”میاں“ اور ”آزادی مارچ“ عمران نیازی کے ذہن پر سوار رہے، میاں نواز شریف کی بیماری کو ”ڈرامہ“ قرار دیکر عمران نیازی نے ”قطر“ کے جہاز کے ذریعے میاں نواز شریف کی روانگی کو این آر او قرار دیا۔ وہ اپنی رہائشگاہ جامعہ مطلع العلوم میں جماعت اسلامی بلوچستان کے امیر عبدالحق ہاشمی اور دیگر وفود سے گفتگو کر رہے تھے۔ حافظ حسین احمد نے مزید کہا کہ عمران نیازی کے میانوالی کے خطاب میں این آر او کے اعتراف کے بعد یہ بھی واضح ہوتا ہے کہ این آر او نکے نے نہیں بلکہ کسی اور نے دیا ہے اور اس کا اعتراف شیخ رشید کے اس بیان کہ”نواز شریف کے صاحبزادوں نے برطانیہ کے ذریعہ دباؤ ڈال کر این آر او کروایا اور اس میں ”قطر“ نے اس بار خط کے بجائے جرمانہ اور طیارہ فراہم کیا“ اور اس وجہ سے پندرہ ماہ میں عمران نیازی فرسٹیشن اور مایوسی کا شکار رہے اور کچھ یقین دہانیوں کے بعد 2روزہ ”روحانی دھرنا“ کا خاتمہ ممکن ہو سکا۔