جبری گمشدہ افراد کے 4 ہزار 474 میں سے 4 ہزار 268 افراد کے کیسز نمٹائے دیے گئے، کمیشن رپورٹ

اسلام ٹائمز۔ لاپتہ افراد کیلئے قائم قومی کمیشن نے زیر سماعت کیسز میں سے 30  نومبر 2019ء تک 4 ہزار 268  کیسز نمٹا دیے ہیں۔ لاپتہ افراد کیلئے قائم قومی کمیشن کے اعلامیہ کے مطابق جسٹس (ر) جاوید اقبال کی ذاتی کوششوں کی بدولت لاپتہ افراد کمیشن کو نمایاں کامیابیاں ملیں ہیں۔ سیکریٹری لاپتہ افراد کمیشن فرید احمد خان کی جانب سے جاری اعلامیہ میں کہا گہا ہے کہ نومبر کے مہینے میں لاپتہ افراد کے حوالے سے 43 کیسز موصول ہوئے۔ سیکریٹری لاپتہ افراد کمیشن کے مطابق مبینہ طورپر جبری گمشدہ افراد کے مقدمات کی تعداد 4 ہزار 474 تھی۔ نومبر 2019ء تک لاپتہ افراد کمیشن نے 4 ہزار 268 افراد کے کیسز نمٹائے دیے۔ اعلامیہ کے مطابق نومبر میں انکوائری کمیشن نے 655 سماعتیں کیں۔ اسلام آباد میں 281 اور لاہور میں 20 مقدمات کی سماعتیں کی گئیں۔ اسی طرح کراچی میں 223 اور کوئٹہ میں 62 سماعتیں کی گئیں۔