اسلام ٹائمز - جنرل قمر جاوید باجوہ کی داتا دربار پر حاضری

آئی ایس پی آر کے مطابق داتا دربار میں حاضری کے موقع پر آرمی چیف جنرل قمر جاوید باجوہ نے ملکی سلامتی و خوشحالی کے لیے دعا بھی کی۔

اسلام ٹائمز۔ آرمی چیف جنرل قمر جاوید باجوہ نے لاہور کا دورہ کیا جہاں انہوں نے داتا دربار پر حاضری دی۔ جنرل قمر جاوید باجوہ نے داتا دربار پر فاتحہ خوانی کی، چادر چڑھائی اور پھول بھی رکھے۔ آئی ایس پی آر کے مطابق داتا دربار میں حاضری کے موقع پر آرمی چیف جنرل قمر جاوید باجوہ نے ملکی سلامتی و خوشحالی کے لیے دعا بھی کی۔ یاد رہے کہ تین دن قبل بہاولپور کے قریب سرمائی تربیتی مشقوں کے موقع پر تقریب سے خطاب کرتے ہوئے آرمی چیف جنرل قمر جاوید باجوہ نے کہا تھا کہ پاک افواج ہر طرح کے چیلنجز سے نبرد آزما ہونے کے لیے ہمہ وقت تیار ہے، تربیتی مشقیں حربی صلاحیتوں کو نکھارنے میں مدد دیتی ہیں۔ آئی ایس پی آر کے مطابق آرمی چیف نے بہاولپور کے قریب اسٹرائیک کور کا دورہ کیا تھا، اس موقع پر آرمی چیف نے سرمائی تربیتی مشقیں دیکھیں، اس کے علاوہ آرمی چیف نے ٹرانس فرنٹیئر آپریشنز کا بھی جائزہ لیا۔ ان مشقوں میں پاک فضائیہ اور سعودی زمینی افواج کے دستے بھی شریک تھے، سعودی افواج کے ڈپٹی کمانڈر میجر جنرل احمد بن عبداللہ المقرن نے بھی یہ مشقیں دیکھیں جب کہ آرمی چیف نے پاک فضائیہ سمیت تمام شرکا کے تربیتی معیار کی تعریف کی۔