جی بی میں نیب کی کارکردگی سیمینار اور فوٹو سیشن تک محدود ہے، عارف قنبری

اسلام ٹائمز۔ مجلس وحدت مسلمین گلگت بلتستان کے رہنما و رکن شوری عالی عارف حسین قنبری نے کہا ہے کہ جی بی میں کرپشن حد سے بڑھ گئی ہے اور اینٹی کرپشن کا ادارہ نیب کی کل کارکردگی سیمنارز کے انعقاد اور مسیجز تک محدود ہے۔ اپنے ایک بیان میں عارف قنبری نے کہا کہ گلگت بلتستان میں کرپٹ آفیسروں کیخلاف کاروائی کی بجائے نیب ان کے ساتھ فوٹو سیشن کر رہا ہے۔ مسیجز، سیمینارز کے انعقاد اور ریلیاں نکالنے سے کرپشن ختم نہیں ہوگی، علاقے کو ترقی کی راہ پر گامزن کرنے کیلئے کرپشن کا قلع قمع از حد ضروری ہے جس کے بغیر ترقی و خوشحالی کا خواب ادھورا رہ جائیگا۔ انہوں نے کہا کہ جی بی میں ایک عرصے سے حکومتی سطح پر کرپٹ پریکٹس بڑے زور و شور سے جاری ہے اور نیب نے پراسرار خاموشی اختیار کی ہوئی ہے۔ نیب نے نہ صرف خاموشی اختیار کی ہے بلکہ کرپٹ آفیسروں کے ساتھ فوٹو سیشن کرتی رہتی ہے، ایسا لگ رہا ہے کہ نیب اور کرپٹ آفیسرز کا گٹھ جوڑ ہو چکا ہے۔ انہوں نے کہا کہ کئی سالوں سے سرکاری ملازمتیں فروخت ہو رہی ہے، ٹھیکوں کی کھلے عام بولیاں لگائی جارہی ہیں اور من پسند افراد کو ملازمتوں میں کھپایا جا رہا ہے اور اپنے پیاروں کو ٹھیکے نیلام کئے جا رہے ہیں اور نیب لاچار و بےبس تماشائی بنا ہوا ہے، جو لوگ کل تک ایک ایک پائی کے محتاج تھے وہ آج کروڑوں کے مالک بن گئے ہیں، دولت کی اس غیر منصفانہ تقسیم سے معاشرہ بگاڑ کا شکار ہوچکا ہے۔ انہوں نے مزید کہا کہ مرکزی حکومت جی بی میں ایسے مخلص اور دباؤ کو قبول نہ کرنیوالے افراد کو تعینات کرے تاکہ کرپشن کیخلاف پی ٹی آئی حکومت کے نعرے کو عملی جامہ پہنایا جاسکے۔