اسلام ٹائمز۔ بلتستان میں ڈاکٹروں کی اسامیوں پر بھرتیوں کیلئے عمر اور ڈومیسائل کی شرط ختم کر دی گئی۔ بھرتیاں میرٹ پر ہوں گی۔ ڈائریکٹر محکمہ صحت بلتستان ڈاکٹر محمد اقبال نے میڈیا کو بتایا کہ سکردو ہسپتال کے ڈاکٹروں نے ہڑتال کی تھی جو کامیاب مذاکرات کے بعد ختم ہو گئی ہے، اب میرٹ پر بھرتیاں ہوں گی، اس حوالے سے 29 نومبر کو اسامیاں مشتہر کی جا چکی ہیں۔ انہوں نے کہا کہ سکردو ہسپتال پر چار اضلاع کا بوجھ ہے، ڈاکٹروں کی کمی کی وجہ سے شدید مشکلات کا سامنا ہے، مسائل کے حل کیلئے اقدامات کئے جا رہے ہیں۔