سوڈان، استاد کو دوران حراست قتل کرنے کے الزام پر انٹیلیجنس سروس کے 29 عہدیداروں کو سزائے موت سنا دی گئی

حکومتی ایجنسی کی حراست میں استاد احمد الخیر کی موت سابق صدر کے خلاف احتجاج میں شدت کا نقطہ آغاز بن گئی تھی، جس کے حوالے سے ان کے اہل خانہ کا کہنا تھا کہ حکومتی عہدیداروں نے پہلے دعویٰ کیا تھا کہ زہر خورانی سے وفات پاگئے ہیں، لیکن سرکاری تفتیش میں تصدیق کی گئی کی وہ تشدد سے جاں بحق ہوئے۔ احمد الخیر کے بھائی سعد نے عدالتی فیصلے کے بعد کہا کہ آج انصاف کی جیت کا دن ہے، تمام سوڈانیوں کی فتح اور انقلاب کے لیے فتح ہے۔ سوڈان کے شہر اومدرمان میں عدالت کے باہر سینکڑوں افراد موجود تھے، جو فیصلے کے منتظر تھے، جن میں سے اکثر نے سوڈان کا قومی پرچم بھی تھاما ہوا تھا اور احمد الخیر کی تصاویر بھی لیے کھڑے تھے۔ عدالت کا فیصلہ آتے ہی وہاں پر موجود تمام شرکاء نے جشن منانا شروع کر دیا۔ سابق صدر عمرالبشیر کے خلاف احتجاج شروع کرنے والی سوڈانیز پروفیشنل ایسوسی ایشن (ایس پی اے) کا کہنا تھا کہ فیصلے نے عدالیہ پر اعتماد کو بحال کر دیا ہے۔ ان کا کہنا تھا کہ اس فیصلے سے انقلاب کے شہداء کو پہلا صلہ مل گیا ہے اور شہداء کے لیے یہ سلسلہ جاری رہے گا۔

خیال رہے 2019ء کے اوائل میں سابق صدر عمرالبشیر کے خلاف شروع ہونے والے احتجاج کے دوران درجنوں افراد سکیورٹی فورسز کی فائرنگ کا نشانہ بنے تھے۔ سوڈان کی عدالت نے 14 دسمبر کو سابق صدر عمرالبشیر کو کرپشن کے ایک مقدمے میں 2 سال کی سزا سنائی تھی، جو ان کے خلاف دائر کئی مقدمات میں سے ایک تھا۔ طویل عرصے تک سوڈان میں حکمرانی کرنے والے عمرالبشیر کو رواں برس اپریل میں عوام کے طویل احتجاج کے نتیجے میں فوج نے معزول کر دیا تھا، جس کے بعد ان کے خلاف کرپشن کے مقدمات قائم کیے گئے تھے۔ عمرالبشیر کو معزول کرنے کے بعد فوج نے اقتدار اپنے ہاتھ میں لیا تھا، جس پر احتجاج میں مزید شدت آگئی تھی اور مظاہرین نے مطالبہ کیا تھا کہ فوج حکومت چھوڑ کر واپس چلی جائے اور سویلین افراد کو حکومت کا حق دیا جائے، جس پر فوج کو معاہدہ کرنا پڑا تھا۔