اسلام ٹائمز۔ اسپیکر پنجاب اسمبلی چودھری پرویز الٰہی سے قائم مقام گورنر بلوچستان عبدالقدوس بزنجو کی ملاقات ہوئی۔ دونوں اعلیٰ حکام کے درمیان اس ملاقات میں موجودہ ملکی سیاسی صورتحال اور باہمی دلچسپی کے امور پر تبادلہ خیال کیا گیا۔ اس موقع پر اسپیکر پنجاب اسمبلی چوہدری پرویز الٰہی کا کہنا تھا کہ بلوچستان کے عوام کی محرومیوں کا ہر صورت ازالہ کرنا ہوگا۔ ان کا یہ بھی کہنا تھا کہ چاروں صوبوں کے درمیان وفود کے تبادلے ہونے چاہئیں۔ چودھری پرویز الٰہی کا کہنا تھا کہ پنجاب اور بلوچستان کے عوام کے دل اکٹھے دھڑکتے ہیں۔ انہوں نے مزید کہا کہ بلوچستان کے عوام ہمارے ماتھے کا جھومر ہیں، بلوچستان کی ترقی پاکستان کی ترقی ہے۔ ان کا یہ بھی کہنا تھا کہ بلوچستان میں امن و امان کی صورتحال بہتر ہو رہی ہے۔