QR Code

خطہ مزید کسی کشیدگی کا متحمل نہیں ہوسکتا، شاہ محمود قریشی

11 Jan 2020 12:07

میڈیا رپورٹس کے مطابق وزیر خارجہ شاہ محمود قریشی نے کہا کہ تہران کے دورے پر ایرانی قیادت سے ملاقات کروں گا، ایران کے مؤقف کو سمجھنے کی کوشش کی جائیگی۔

اسلام ٹائمز۔ وزیر خارجہ شاہ محمود قریشی نے کہا ہے کہ تہران دورے کے موقع پر ایران کے مؤقف کو سمجھنے کی کوشش کی جائے گی۔ اپنے خصوصی بیان میں وزیر خارجہ پاکستان نے کہا کہ ہمیں ایران میں طیارہ حادثے پر بہت افسوس ہے، بہت سے معصوم لوگ حادثے کا شکار بنے، ایران نے حادثاتی طور پر طیارہ گرانے کا اعتراف کیا، اچھی بات ہے کہ کچھ بھی دنیا سے چھپایا نہیں۔ شاہ محمود قریشی کا کہنا تھا کہ خطے میں کشیدگی کم کرنے کے لئے وزیراعظم عمران خان کی ہدایت پر ایران جا رہے ہیں، ایران کے بعد سعودی عرب اور امریکا بھی جاؤں گا اور پاکستان کا مؤقف پیش کروں گا، خطہ مزید کسی لڑائی کا متحمل نہیں ہو سکتا، کشیدگی میں کمی کے لئے وزیر اعظم کی ہدایت پر تہران روانہ ہوں گا۔

انہوں نے کہا کہ ایران کے مؤقف کو سمجھنے کی کوشش کی جائے گی، امریکا کا دورہ بھی کروں گا، امریکی صدر ٹرمپ کے بیان سے امید کی کرن دکھائی دی ہے، عراقی وزیر خارجہ سے بھی ملاقات کروں گا۔ خیال رہے کہ آج ایران نے باضابطہ طور پر یوکرین طیارے کی تباہی کے سلسلے میں اعتراف کر لیا ہے کہ یہ انسانی غلطی کا شاخسانہ تھا، ایران نے غلطی سے طیارے کو میزائل کا نشانہ بنایا، جس میں 176 افراد ہلاک ہوئے۔ ادھر امریکا ایران کشیدگی عروج پر ہے، واشنگٹن نے تہران پر نئی پابندیاں عائد کر دی ہیں، دھاتوں کی ایکسپورٹ، سترہ میٹل اور مائننگ کمپنیوں سے کاروبار ممنوع قرار دے دیا گیا، آٹھ سینئر ایرانی حکام بھی امریکی پابندیوں کی زد میں آ گئے ہیں۔
 

خبر کا کوڈ: 837802