چینی لڑاکا طیاروں کو خطرناک لیزر ہتھیاروں سے مسلح کرنے کی تیاری
19 Jan 2020 12:02
امریکی جریدے ’’پاپولر مکینکس‘‘ کے مطابق کم طاقت والے لیزر ہتھیار، لڑاکا طیاروں کو اس قابل بنائیں گے کہ وہ دشمن کے لڑاکا طیاروں کے علاوہ چھوٹے موٹے میزائلوں کو بھی دوران پرواز تباہ کر سکیں۔
اسلام ٹائمز۔ ہانگ کانگ سے شائع ہونے والے اخبار ’’ساؤتھ چائنا مارننگ پوسٹ‘‘ کی ایک تازہ خبر میں انکشاف کیا گیا ہے کہ چین نے جدید لڑاکا طیاروں کو لیزر ہتھیاروں سے مسلح کرنے کی تیاری شروع کر دی ہے جو ڈاگ فائٹ (لڑاکا طیاروں کی دُوبدو لڑائی) میں دشمن طیاروں کو پلک جھپکتے میں فضا میں ہی تباہ کر ڈالیں گے۔ اس طرح یہ طیارے نہ صرف اپنی حفاظت خود کر سکیں گے بلکہ غیر مسلح فوجی طیاروں کے محافظ بھی بن سکیں گے۔ اس خبر میں چینی فوج (پیپلز لبریشن آرمین) آرمی کے زیرانتظام چلنے والی ایک ویب سائٹ پر آنے والے حالیہ اشتہارات کا حوالہ دیا گیا ہے جن میں لڑاکا طیاروں پر تنصیب کے قابل لیزر اور متعلقہ کنٹرول سافٹ ویئر فروخت کرنے والے مقامی (چینی) اداروں سے ٹینڈر طلب کیے گئے ہیں۔ پنٹاگون بھی جدید ٹیکنالوجی کی خریداری کے لیے اسی طرح کی امریکی ویب سائٹس استعمال کرتا ہے جن کے ذریعے ’’مخصوص امریکی اداروں‘‘ کو اشارہ کیا جاتا ہے۔
خبر کا کوڈ: 839361