QR Code

کراچی میں آتشزدگی سے 200 جھگیاں خاکستر، سردی میں غریب افراد دربدر

22 Jan 2020 18:02

آگ لگتے ہی جھگیوں کے مکینوں میں چیخ و پکار مچ گئی جبکہ خواتین چھوٹے بچوں کو سینے سے لگائے جان بچانے کے لئے محفوظ مقام کی جانب دوڑتی ہوئی دکھائی دیں۔ دیگر مکین جھگیوں سے قیمتی سامان نکالنے کی کوششیں کرتے رہے، تاہم جان بچانے کے لئے انہیں بھی اپنا سامان چھوڑ کر وہاں سے ہٹنا پڑا۔

اسلام ٹائمز۔ تین ہٹی پل کے نیچے قائم جھگیوں میں رات گئے اچانک آگ بھڑک اٹھی جس نے دیکھتے ہی دیکھتے جھگیوں کو اپنی لپیٹ میں لے لیا۔ آتشزدگی کے باعث 200 جھگیاں اور ان میں موجود سامان جل کر خاکستر ہوگیا جبکہ 450 سے 500 افراد متاثر ہوئے، تاہم معجزانہ طور پر کوئی جانی نقصان نہیں ہوا۔ آگ لگتے ہی جھگیوں کے مکینوں میں چیخ و پکار مچ گئی جبکہ خواتین چھوٹے بچوں کو سینے سے لگائے جان بچانے کے لئے محفوظ مقام کی جانب دوڑتی ہوئی دکھائی دیں۔ دیگر مکین جھگیوں سے قیمتی سامان نکالنے کی کوششیں کرتے رہے، تاہم جان بچانے کے لئے انہیں بھی اپنا سامان چھوڑ کر وہاں سے ہٹنا پڑا۔ جھگیوں کے مکین اپنا مال اسباب جلتا دیکھ کر زار و قطار روتے رہے جبکہ خواتین شدت غم سے نڈھال ہوگئیں۔ متاثرین کا کہنا تھا کہ آگ نے ہمارے سروں سے چھت چھین لی، اب اس سرد موسم میں اپنے بال بچوں کے ساتھ کہاں جائیں۔

خبر کا کوڈ: 840041