QR Code

آٹا بحران، وزیراعظم کی تحقیقاتی کمیٹی آج کام شروع کریگی

23 Jan 2020 12:25

حکومت کی جانب سے آٹے کا بحران پیدا کرنے والے اور وجوہات کی رپورٹ مانگ لی گئی ہیں، اس تناظر میں وزیراعظم سیکرٹریٹ کی جانب سے آٹے بحران کی رپورٹ ایف آئی اے کو دینے کی ہدایات کی گئی ہے۔ میڈیا ذرائع کا کہنا ہے کہ ایف آئی اے مکمل تحقیقات کرنے کے بعد ڈی جی ایف آئی اے رپورٹ مرتب کریں گے۔

اسلام ٹائمز۔ آٹے اور گندم کے بحران سے متعلق وزیراعظم عمران خان کی تحقیقاتی کمیٹی آج سے کام شروع کرے گی۔ میڈیا ذرائع کے مطابق تحقیقاتی کمیٹی اقتصادی رابطہ کمیٹی (ای سی سی) کے فیصلوں کا ریکارڈ بھی حاصل کرے گی جبکہ کمیٹی اپنی ابتدائی رپورٹ عمران خان کی وطن واپسی پر پیش کرے گی۔ پاسکو اور پنجاب کے پاس گندم کی دستیابی، کے پی اور سندھ کی جانب سے گندم نہ اٹھانے اور افغانستان اسمگلنگ ہونے کے معاملے کو بھی کمیٹی دیکھے گی۔ میڈیا ذرائع کے مطابق وزیراعظم نے گندم اور آٹے کے درست اعداد و شمار نہ دینے پر متعلقہ اداروں اور وزارتوں پر برہمی کا اظہار کیا ہے۔ بتایا جارہا ہے کہ تحقیقاتی رپورٹ کی روشنی میں وفاق اور صوبوں میں تعینات ذمہ داروں کے خلاف کارروائی بھی کی جائے گی۔ کمیٹی تحقیقات کرے گی کہ کوئی سیاسی یا بااثر شخصیت تو اس بحران کی ذمہ دار تو نہیں تھی۔ ذرائع کے مطابق شفاف اور میرٹ پر مبنی تحقیقات کے لیے ڈی جی ایف آئی اے واجد ضیاء کو ذمہ داری سونپی گئی ہے جنہیں آئی بی کے گریڈ 21 کے افسر کی معاونت بھی حاصل ہو گی۔ ذرائع کا مزید کہنا تھا کہ آئی بی کی گندم اور آٹے کے بحران پر مبنی رپورٹ کو بھی تحقیقات کا حصہ بنایا جائے گا۔ کمیٹی آج سے اپنا کام شروع کرے گی۔ 

خبر کا کوڈ: 840171