اسلام ٹائمز۔ انسپکٹر جنرل آف پولیس گلگت بلتستان ڈاکٹر مجیب الرحمٰن ایک روزہ دورے پر چلاس پہنچ گئے۔ چلاس میں پولیس کے چاق و چوبند دستے نے سلامی دی، ان کے ہمراہ ڈی آئی جی رینج حنیف اللہ، ڈی آئی جی ہیڈ کوارٹر افضل بٹ و دیگر حکام بھی موجود تھے۔ آئی جی پی نے چلاس میں مختلف چیک پوسٹوں کا دورہ کیا۔ چلاس ایس پی آفس میں آئی جی پی کو دیامر میں امن و امان کی مجموعی صورت حال پر بریفنگ دی گئی۔ اس موقع پر آئی جی پی نے کہا کہ پولیس عوام کی جان و مال کی حفاظت کیلئے کوئی دقیقہ فروگزاشت نہ کرے اور اپنے فرائض کی انجام دہی میں کوئی کوتاہی نہ برتی جائے۔