اسلام ٹائمز۔ سابق وزیر داخلہ، پاکستان پیپلز پارٹی کے سینئر رہنما اور سینیٹر رحمان ملک نے مسئلہ کشمیر کے موضوع پر فلم بنانے کا اعلان کیا ہے۔ اُن کا کہنا ہے کہ وہ مسئلہ کشمیر کو عالمی سطح پر اجاگر کرنے کیلئے فلم بنائیں گے۔ رحمان ملک نے بتایا کہ کشمیر کے حوالے سے کتاب لکھنے کے دوران انہیں فلم بنانے کا خیال آیا، کشمیر کے موضوع پر فلم کا 50 فیصد سکرپٹ لکھا جا چکا ہے جو کہ وہ خود لکھ رہے ہیں۔ رحمان ملک کا کہنا تھا کہ اس فلم کی کہانی کے ذریعے دنیا کو کشمیر کی کہانی سے آگاہ کریں گے۔ رحمان ملک نے مزید بتایا کہ فلم کی کاسٹ اور ڈائریکشن کے بارے میں تاحال کوئی حتمی فیصلہ نہیں کیا گیا تاہم یہ طے ہے کہ اس کو بنانے کا مقصد دنیا کے سامنے بھارت کا مکروہ چہرہ بے نقاب کرنا ہے۔ یاد رہے کہ اس سے قبل رحمان ملک نے بھارتی مظالم بے نقاب کرنے کیلئے ’’بلیڈنگ کشمیر‘‘ نامی کتاب لکھی ہے جس میں انہوں نے کمشیریوں کی جدوجہد آزادی اور بھارتی کے غیر انسانی اقدامات سے پردہ اُٹھایا ہے۔