اسلام ٹائمز۔ کورونا وائرس کے پاکستان پہنچ جانے کے بعد ایرانی دارالحکومت تہران سے کراچی پہنچنے والی ایران ایئر کی پرواز آئی آر 812 کی مکمل اسکریننگ کے بعد پرواز کے تمام 232 مسافروں کو کلیئر قرار دے دیا گیا ہے۔ ذرائع وزارت صحت کے مطابق تہران سے آئی پرواز کو برج پر لگنے سے روک کر محفوظ مقام پر پارک کیا گیا۔ محکمہ صحت کی ٹیموں نے مسافروں کی اسکریننگ رن وے پر مکمل کی اور رن وے پر ہی حفاظتی اقدامات کے تحت ایمبولینس طلب کی گئی۔ ہیلتھ ڈیکلیریشن کے ساتھ مسافروں کا سفری ڈیٹا بھی طلب کیا گیا۔ ایئرپورٹ ذرائع کے مطابق کورونا وائرس سے حفاظت کیلئے ایرانی ایئرلائن کے طیارے میں اسپرے بھی کیا گیا۔