اسلام ٹائمز۔ گلگت میں کرونا وائرس کا ایک مریض مکمل طور پر صحت یاب ہو گیا۔ بدھ کے روز محمد آباد ہسپتال گلگت میں زیر علاج کرونا وائرس کا مریض شیر عباس کو صحت یاب ہونے اور لیبارٹری رپورٹ منفی آنے کے بعد گھر بھیج دیا گیا۔ وہ کوڈ 19 کا شکار ہونے کے بعد محمد آباد ہسپتال میں قائم آئسولیشن سنٹر میں گزشتہ چودہ روز سے زیر علاج تھا۔ بدھ کے روز ان کا دوبارہ کرونا وائرس ٹیسٹ کیا گیا جس کی رپورٹ منفی آنے کے بعد انہیں گھر جانے کی اجازت دی گئی تاہم انہیں اگلے چودہ روز کیلئے گھر پر بھی قرنطینہ میں رہنے کی ہدایت کی گئی ہے۔