اسلام ٹائمز - بھارت کے 75 اضلاع میں مکمل طور پر لاک ڈاؤن

بھارتی دارالحکومت نئی دہلی میں بھی مکمل لاک ڈاؤن کا اعلان کر دیا گیا ہے۔ وزیراعلیٰ اروند کیجریوال نے کہا کہ نئی دہلی لاک ڈاؤن کے دوران ضروری اشیا کی سپلائی اور ضروری دکانیں کھلی رہیں گی، تمام ڈومیسٹک پروازیں بھی 31 مارچ تک بند رہیں گی۔

اسلام ٹائمز۔ بھارت میں کورونا وائرس کے پیش نظر تمام بین الریاستی بس اور میٹرو سروسز، مسافر ٹرینوں اور غیرضروری مسافر گاڑیوں کو 31 مارچ تک بند کر دیا گیا ہے۔ کورونا کے پھیلاؤ کو روکنے کے لیے غیر معمولی اقدامات کیے جا رہے ہیں اور جن 75 اضلاع میں کورونا کیسز رپورٹ ہوئے ہیں اُنہیں مکمل طور پر لاک ڈاؤن کر دیا گیا ہے۔ یہ فیصلے تمام بھارتی ریاستوں اور کابینہ سیکریٹریز کے اعلیٰ سطح کے اجلاس میں لیے گئے۔ اُدھر بھارتی دارالحکومت نئی دہلی میں بھی مکمل لاک ڈاؤن کا اعلان کر دیا گیا ہے۔ وزیراعلیٰ اروند کیجریوال نے کہا کہ نئی دہلی لاک ڈاؤن کے دوران ضروری اشیا کی سپلائی اور ضروری دکانیں کھلی رہیں گی، تمام ڈومیسٹک پروازیں بھی 31 مارچ تک بند رہیں گی۔ انہوں نے کہا کہ نجی دفاتر بند رہیں گے، تمام مستقل و کنٹریکٹ ملازمین گھروں پر رہیں گے لیکن اُنہیں آن ڈیوٹی تصور کیا جائے گا اور کمپنیاں گھر پر موجود ملازمین کو لاک ڈاؤن کے دوران تنخواہ ادا کریں گی۔ بھارتی ریاستوں تلنگانہ اور بہار میں بھی کورونا وائرس کے پیش نظر 31 مارچ تک لاک ڈائون رہے گا۔