اسلام ٹائمز - جنگ کے 5 سال مکمل ہونے پر جارح سعودی اتحاد کیطرف سے یمن پر ایک دن میں 100 سے زائد حملے

جنگ کے 5 سال مکمل ہونے پر جارح سعودی اتحاد کیطرف سے یمن پر ایک دن میں 100 سے زائد حملے

یمنی خبررساں ایجنسی سبأ کے مطابق سعودی جنگی طیاروں نے یمنی صوبے مأرب کے شہر صراوح اور مجزر کو 20 سے زائد مرتبہ اپنے ہوائی حملوں کا نشانہ بنایا ہے۔ علاوہ ازیں سعودی عرب نے طے پانے والے سویڈن معاہدے کی خلاف ورزی کرتے ہوئے یمن کے مغربی صوبے الحدیدہ پر بھی 111 بار توپخانے سے حملہ کیا ہے۔

اسلام ٹائمز۔ یمن پر مسلط کردہ سعودی جنگ کی پانچویں سالگرہ کے روز گزشتہ 24 گھنٹوں کے دوران جارح سعودی عرب کی طرف سے یمن پر 100 سے زائد حملے کئے گئے ہیں۔ تفصیلات کے مطابق گزشتہ 24 گھنٹوں میں جارح سعودی فوجی اتحاد نے یمن کے صوبوں مأرب، الجوف، الحدیدہ اور حجہ پر 100 سے زائد مرتبہ ہوائی حملے اور گولہ باری کی ہے۔ یمنی خبررساں ایجنسی سبأ کی رپورٹ کے مطابق سعودی جنگی طیاروں نے یمنی صوبے مأرب کے شہر صراوح اور مجزر کو 20 سے زائد مرتبہ اپنے ہوائی حملوں کا نشانہ بنایا ہے۔ علاوہ ازیں سعودی عرب نے طے پانے والے سویڈن معاہدے کی خلاف ورزی کرتے ہوئے یمن کے مغربی صوبے الحدیدہ پر بھی 111 بار توپخانے سے حملہ کیا ہے۔

ذرائع کے مطابق سعودی توپخانے کے ان حملوں میں الحدیدہ کا المنظر اور الخامری نامی علاقہ شدید متاثر ہوا ہے۔ گزشتہ 24 گھنٹوں کے دوران سعودی توپخانے کے ان حملوں میں یمنی شہروں مثلث العدین، حیس، الشجن اور الخمسین سمیت متعدد شہری آبادیوں کو نشانہ بنایا گیا ہے تاہم یمنی حکام کی طرف سے ان حملوں سے ہونے والے جانی و مالی نقصان کی تفصیلات تاحال جاری نہیں کی گئیں۔ واضح رہے کہ سعودی عرب کی طرف سے یمن پر مسلط کردہ اس وحشتناک جنگ کو آج کے روز 5 سال مکمل ہو رہے ہیں جبکہ اس جنگ کی وجہ سے اکثر یمنی شہریوں کے وبائی امراض اور قحط کا شکار ہو جانے کے علاوہ دسیوں لاکھ بےگناہ یمنی شہری شہید و زخمی بھی ہو چکے ہیں۔