QR CodeQR Code

ایک چھوٹے سے جرثومے نے پوری دنیا کو بیدار کر دیا ہے، علامہ عبدالخالق اسدی

31 Mar 2020 11:59

المجلس ڈیزاسٹر مینجمنٹ سیل کے ارکان کو ہدایات دیتے ہوئے ایم ڈبلیو ایم پنجاب کے سیکرٹری جنرل کا کہنا تھا کہ آئیے اپنے رب کی طرف پلٹ جائیں جو کہ شاید ہم سے ناراض ہوگیا ہے اور تیز دوڑتی ہوئی دنیا کو یک دم اپنی جگہ پر روک دیا ہے، سب لوگ اپنے گھروں میں قیدی بن گئے ہیں لیکن ہر عذاب کسی کیلئے عذاب اور کسی کیلئے یاد دہانی بن جاتا ہے۔


اسلام ٹائمز۔ مجلس وحدت مسلمین پنجاب کے سیکرٹری جنرل علامہ عبدالخالق اسدی نے کہا ہے کہ کرونا جو کہ ایک چھوٹا سا جرثومہ ہے اس نے پوری دنیا کو بیدار کر دیا ہے، اللہ جو تمام جہانوں کا رب ہے، اگر چاہے تو ایک چھوٹے سے جرثومے سے بڑی سے بڑی طاقتوں کو زیر کر دے اور چاہے تو اپنی مخلوق کو محفوظ کر دے۔ لاہور میں المجلس ڈیزاسٹر مینجمنٹ سیل کے ارکان کو ہدایات دیتے ہوئے انہوں نے کہا کہ آئیے اپنے رب کی طرف پلٹ جائیں جو کہ شاید ہم سے ناراض ہوگیا ہے اور تیز دوڑتی ہوئی دنیا کو یک دم اپنی جگہ پر روک دیا ہے، سب لوگ اپنے گھروں میں قیدی بن گئے ہیں لیکن ہر عذاب کسی کیلئے عذاب اور کسی کیلئے یاد دہانی بن جاتا ہے۔

علامہ اسدی نے کہا کہ یہ وقت کسی کیلئے سخت تکلیف اور ڈپریشن کا ہے، جبکہ کسی کیلئے اللہ کی طرف رجوع، توبہ استغفار، اپنے اہلخانہ کی خدمت و تربیت اور اردگرد رہنے والے غریب لوگوں کی مدد کا ہے۔ جو لوگ غربت کی لکیر سے نیچے زندگی بسر کر رہے ہیں ان کے چولہے جلانے کا وقت ہے۔ انہوں نے کہا کہ ہمیں چاہیے کہ اللہ کے بندے جنہیں اللہ نے اپنا کنبہ کہا ہے، اس کنبے کی خدمت کرکے اس وقت کو قیمتی بنائیں اور اپنے اعمال کو اخلاص اور ندامت کے آنسوؤں سے خالص بنائیں۔ انہوں نے کہا کہ مجلس وحدت مسلمین بلاتفریق مذہب و مسلک، انسانیت کی خدمت کیلئے کوشاں ہے اور مشکل کی اس گھڑی میں بھی مستحقین کو تنہا نہیں چھوڑیں گے۔


خبر کا کوڈ: 853737

خبر کا ایڈریس :
https://www.islamtimes.org/ur/news/853737/ایک-چھوٹے-سے-جرثومے-نے-پوری-دنیا-کو-بیدار-کر-دیا-ہے-علامہ-عبدالخالق-اسدی

اسلام ٹائمز
  https://www.islamtimes.org