QR Code

25 دن گزرنے کے باوجود بھی حکومت غریب عوام تک ایک پیسے کا راشن پہنچانے سے قاصر ہے، شاہ اویس نورانی

10 Apr 2020 02:37

حیدرآباد میں ضرورت مند خاندانوں میں راشن تقسیم کے موقع پر ٹیلیفونک خطاب میں جے یو پی رہنما نے کہا کہ مذہبی جماعتیں اپنی بساط کے مطابق لوگوں کو راشن فراہم کررہی ہیں جو کہ ناکافی ہے۔ انہوں نے حکومت سے مطالبہ کیا کہ فوری طور پر راشن کی تقسیم کا عمل شروع کیا جائے۔

اسلام ٹائمز۔ جمعیت علماء پاکستان کے سیکریٹری جنرل شاہ محمد اویس نورانی صدیقی نے کہا ہے کہ 25 دن گزرنے کے باوجود بھی حکومت غریب عوام تک ایک پیسے کا راشن پہنچانے سے قاصر ہے، حکومت صرف سیاست کے لئے ٹائیگر فورس کے قیام جیسے دعویٰ کررہی ہے اور صرف زبانی طور پر غریب عوام کو ریلیف پہنچایا جارہا ہے، کب ٹائیگر فورس بنے گی کب ریلیف ملے گا، اسی آس میں غریب بھوک سے ختم ہوجائیں گے۔

ان خیالات کا اظہار انہوں نے جے یو پی حیدرآباد کی طرف سے الخادم ویلفیئر ٹرسٹ کے تحت ضرورت مند خاندانوں میں راشن تقسیم کے موقع پر ٹیلیفونک خطاب میں کیا۔ اس موقع پر ضلعی صدر حاجی معین شیخ، کرامت راجپوت، غلام حسین آرائیں، غلام مصطفی نورانی، عبدالحفیظ قریشی و دیگر بھی موجود تھے۔ محمد اویس نورانی نے کہا کہ مذہبی جماعتیں اپنی بساط کے مطابق لوگوں کو راشن فراہم کررہی ہیں جو کہ ناکافی ہے۔ انہوں نے حکومت سے مطالبہ کیا کہ فوری طور پر راشن کی تقسیم کا عمل شروع کیا جائے۔

خبر کا کوڈ: 855715