ملک و قوم کا دفاع کرنیوالی ایرانی فوج کی رگوں میں خدا پر بھروسہ خون بن کر دوڑ رہا ہے، سید عباس موسوی

اسلام ٹائمز۔ ایرانی وزارت خارجہ کے ترجمان سید عباس موسوی نے ایران میں فوج کے قومی دن کی مناسبت سے ٹوئٹر پر جاری ہونے والے اپنے ایک پیغام میں فوج کو مبارکباد پیش کی ہے۔ سید عباس موسوی نے اپنے پیغام میں ایران پر عائد یکطرفہ پابندیوں کے باوجود ایرانی فوج کی طرف سے ملک و قوم کے دفاع کے ساتھ ساتھ دنیا بھر میں تیزی کے ساتھ پھیلتے کرونا وائرس کے ساتھ فوج کے کامیاب مقابلے کی طرف اشارہ کرتے ہوئے لکھا کہ جنگی مہارتوں کے علاوہ جس چیز نے ایرانی قوم کو دنیا بھر میں زبان زد عام و خاص کر دیا ہے، وہ عوام کے ساتھ اس کی مکمل یکجہتی اور گہرا تعلق ہے۔ سید عباس موسوی نے اس دن کے حوالے سے ایرانی قوم و مسلح افواج کو مبارکباد پیش کرتے ہوئے لکھا کہ ملک و قوم کا دفاع کرنے والی ایرانی مسلح افواج کی غیرت مند رگوں میں خدا پر بھروسہ اور ملک و قوم پر یقین خون بن کر دوڑ رہا ہے۔