0
Thursday 21 May 2020 14:50

خیبر پختونخوا میں کورونا سے صحتیاب ہونے مریضوں کی شرح ملک میں سب سے زیادہ ہے، صوبائی وزیر صحت

خیبر پختونخوا میں کورونا سے صحتیاب ہونے مریضوں کی شرح ملک میں سب سے زیادہ ہے، صوبائی وزیر صحت
اسلام ٹائمز۔ خیبر پختونخوا کے وزیر صحت تیمور سیلم خان جھگڑا نے کہا ہے کہ صوبے میں کورونا وائرس سے صحت یاب ہونے والے مریضوں کی شرح پورے ملک میں سب سے زیادہ ہے، صوبے میں بروقت اقدامات اور لاک ڈاؤن کرنے سے ہمیں کورونا کے خلاف انتظامات کرنے میں مدد ملی، کورونا تشخیص میں 50 گنا اضافہ کیا ہے، طبی عملے کیلئے حفاظتی سامان کی کمی دور کر دی ہے۔ صوبائی وزیر صحت نے ان خیالات کا اظہار پشاور میں پریس کانفرنس سے خطاب کرتے ہوئے کیا۔ تیمور جھگڑا کا کہنا تھا کہ ہم لاک ڈاؤن کے بعد اگلے مرحلے میں داخل ہوچکے ہیں، لاک ڈاؤن موثر ثابت ہوا ہے اور اس سے کورونا انفلیشن کی شرح کم رہی تھی، اسی لاک ڈاؤن کی وجہ سے صوبائی حکومت کو کورونا کے خلاف اقدامات اٹھانے اور صحت سہولیات کو بہتر کرنے میں مدد ملی ہے۔ تیمور سلیم جھگڑا نے کہا کہ 200 آئسولیشنز قائم کیں جن میں 5598 بستروں کی گنجائش ہے، اسی طرح 359 قرنطینہ مراکز قائم کئے اور 550 سے زائد وینٹی لیٹرز کورونا مریضوں کیلئے مختص کئے ہیں۔ انہوں نے کہا کہ ساری دنیا یہ جان چکی ہے کہ لاک ڈاؤن سے کورونا وائرس کا مستقل حل ممکن نہیں ہے، اگر یہی وائرس کا حتمی حل ہوتا تو امیر ممالک لاک ڈاؤن کے دورانیے کو بڑھاتے۔

تیمور جھگڑا نے کہا کہ خیبر پختونخوا میں کورونا وائرس سے صحت یاب ہونے والے مریضوں کی شرح سب سے زیادہ 31 فیصد ہے جو کہ خوش آئند ہے، ان ریکوریز کے پیچھے ڈاکٹرز کا اہم کردار اور لوگوں کا ڈسپلن ہے۔ انہوں نے کہا کہ ملک میں کورونا تشخیص 30 گنا بڑھی ہے، جبکہ خیبر پختونخوا میں کورونا ٹیسٹنگ میں 50 گنا اضافہ کیا گیا ہے، گذشتہ روز صوبے میں 1650 ٹیسٹ ہوئے ہیں، اسوقت روزانہ کی بنیاد پر اوسطاً 1500 ٹیسٹ ہو رہے ہیں، جبکہ کچھ دن پہلے تک یہ شرح 1000 ٹیسٹ روزانہ تھی، 90 فیصد کورونا ٹیسٹ سرکاری لیبارٹریوں میں ہو رہے ہیں۔ وزیر صحت نے کہا کہ نئی لیبارٹریاں قائم کر رہے ہیں جس سے 3 ہزار ٹیسٹ روزانہ ہوں گے، کورونا سے اموات کے حوالے سے صوبائی وزیر نے بتایا کہ صوبے میں یومیہ 10 سے 12 اموات ہو رہی ہیں اور اس شرح میں ہفتہ وار 3 گنا اضافہ ہو رہا ہے۔ تیمور جھگڑا نے کہا کہ طبی عملے کیلئے حفاظتی سامان کی کمی دور کر دی ہے، اب تک 1.2 ملین ماسک، 76 ہزار حفاظتی لباس، 70 ہزار این 95 ماسک ہسپتالوں کو پہنچا چکے ہیں۔ انہوں نے کہا کہ حکومت صرف کورونا پر ہی توجہ مرکوز نہیں رکھ سکتی، ہم نے دیگر مہلک بیماریوں سے بھی صوبے کے عوام کو بچانا ہے۔
خبر کا کوڈ : 864045
رائے ارسال کرنا
آپ کا نام

آپکا ایمیل ایڈریس
آپکی رائے

ہماری پیشکش