اسلام ٹائمز - چین نے بھارتی جارحیت کا درست جواب دیا ہے، عبدالعلیم خان

بھارت دوسرے ملکوں سے محاذ آرائی کی بجائے اپنے مسائل پر توجہ دے

چین نے بھارتی جارحیت کا درست جواب دیا ہے، عبدالعلیم خان

پنجاب کے سینیئر وزیر کا کہنا تھا کہ بھارت کے دانت کھٹے ہوئے اور ایک مرتبہ پھر اُسے سبکی کا سامنا کرنا پڑا ہے۔ انہوں نے واضح کیا کہ اگر پاکستان سے چھیڑ چھاڑ کی کوشش کی گئی تو انڈیا کو منہ توڑ جواب ملے گا۔ سینئر وزیر پنجاب عبدالعلیم خان نے کہا کہ افواج پاکستان اپنے وطن عزیز کے دفاع کی بھرپور صلاحیت رکھتی ہیں اور اگر وقت آیا تو دشمن کو اینٹ کا جواب پتھر سے دیا جائے گا۔

اسلام ٹائمز۔ سینئر وزیر پنجاب عبدالعلیم خان نے کہا ہے کہ بھارت کی چین سے رسہ کشی کا اصل مقصد پاکستان کو نقصان پہنچانا ہے، کیونکہ مودی سرکار کو پاک چائنہ دوستی ہضم نہیں ہو رہی۔ لاہور میں تقریب سے خطاب میں انہوں نے کہا کہ خطے میں چودھراہٹ کا خواب دیکھنے والے ہندو بنیے کو چین سے منہ کی کھانا پڑی ہے اور اُسے جارحیت کی کوشش کا درست جواب ملا ہے۔ عبدالعلیم خان نے کہا کہ بھارت کے دانت کھٹے ہوئے اور ایک مرتبہ پھر اُسے سبکی کا سامنا کرنا پڑا ہے۔ انہوں نے واضح کیا کہ اگر پاکستان سے چھیڑ چھاڑ کی کوشش کی گئی تو انڈیا کو منہ توڑ جواب ملے گا۔ سینئر وزیر پنجاب عبدالعلیم خان نے کہا کہ افواج پاکستان اپنے وطن عزیز کے دفاع کی بھرپور صلاحیت رکھتی ہیں اور اگر وقت آیا تو دشمن کو اینٹ کا جواب پتھر سے دیا جائے گا۔

انہوں نے کہا کہ وزیر اعظم عمران خان بھارت کیخلاف شروع دن سے ہی دو ٹوک موقف رکھتے ہیں اور انہوں نے اقوام متحدہ سمیت ہر عالمی فورم پر بھارتی ظلم و ستم کو بے نقاب کیا ہے۔ عبدالعلیم خان نے کہا کہ جمہوریت کے نام لیوا مودی کے ارادے کبھی بھی اچھے نہیں رہے، سیکولرازم کا راگ الاپنے والوں کی عدم براشت کھل کر سامنے آگئی ہے اور کشمیر میں عیدالفطر کے دوران بھی بھارتی مظالم کم نہیں کیے گئے۔ انہوں نے کہا کہ عالمی برادری کو اس صورتحال کا فوری نوٹس لینا چاہیے اور چین کیساتھ بھارت کی بلا جواز کشیدگی پر سخت رد عمل ہونا چاہیے۔ عبدالعلیم خان نے لداخ میں چین اور بھارت کے مابین سامنے آنے والی رپورٹوں پر تبصرہ کرتے ہوئے کہا کہ بھارت کو ایک مرتبہ پھر ہزیمت کا سامنا کرنا پڑا ہے اور بہتری اسی میں ہے کہ مودی اور اُن کے حواری دوسرے ملکوں سے محاذ آرائی کی بجائے اپنے اندرونی مسائل پر توجہ دیں اور بھارت کے عوام کی کسمپرسی اور غربت کو دور کریں۔