QR Code
مولانا فضل الرحمن کا چھٹے خلیفہ عمر بن العزیز کے مزار کی بے حرمتی پر شدید غم و غصے کا اظہار
31 May 2020 00:55
اپنے ایک بیان میں جے یو آئی (ف) کے سربراہ نے کہا کہ واقعے پر اسلامی ممالک کے حکمرانوں کی خاموش سوالیہ نشان ہے، اسلامی دنیا اور او آئی سی تنظیم فوراً ایکشن لے کر خلیفہ عمر بن عبدالعزیز کے مزار کو اصل حالت میں بحالی کو یقینی بنائیں اور ذمہ داروں کو عبرت کا نشانہ بنائیں۔
اسلام ٹائمز۔ جمعیت علمائے اسلام کے سربراہ مولانا فضل الرحمن نے شام کے صوبہ ادلب میں واقع چھٹے خلیفہ اسلام حضرت عمر بن عبدالعزیز کے مزار کی شرپسند عناصر کے ہاتھوں بےحرمتی اور پامالی پر شدید غم و غصے کا اظہار کیا ہے۔ مولانا فضل الرحمن نے کہا کہ اس دل دہلا دینے والے واقعے سے عالم اسلام کے دل و دماغ لرز اٹھے ہیں۔ جے یو آئی جیکب آباد کے ضلعی امیر ڈاکٹر اے جی انصاری کی جانب سے جاری پریس ریلیز کی مطابق مولانا فضل الرحمن کا مزید کہنا تھا کہ اس اندوہناک واقعے پر امت مسلمہ کے دل رنجیدہ اور خون کے آنسو رو رہے ہیں، واقعے پر اسلامی ممالک کے حکمرانوں کی خاموش سوالیہ نشان ہے، اسلامی دنیا اور او آئی سی تنظیم فوراً ایکشن لے کر خلیفہ عمر بن عبدالعزیز کے مزار کو اصل حالت میں بحالی کو یقینی بنائیں اور ذمہ داروں کو عبرت کا نشانہ بنائیں۔ انہوں نے کہا کہ اسلام مدفون انسانوں کے اجساد و باقیات کی تضحیک کی کسی صورت اجازت نہیں دیتا۔
مولانا فضل الرحمن نے کہا کہ خلیفہ عمر بن عبدالعزیز صحابہ کرام کی علامت، امت کے مجدد اول اور عالم اسلام کی قابل فخر علامت تھے، ان کا دور حکومت عدل و انصاف اور مساوات کا درخشندہ یادگار تھا، وہ اہل بیت اور پورے عالم اسلام کے محسن منصف حکمران تھے۔ مولانا فضل الرحمن نے خلیفہ عمر بن عبدالعزیز کے مزار کی بےحرمتی اور اہلیہ سمیت دیگر کے جسد خاکی کی توہین اور باقیات کو نذر آتش کرنے کیساتھ مزار سے منتقلی انتہائی مذموم اور قبیح فعل قرار دیا۔ انہوں نے کہا کہ اس دلخراش واقعے کی جتنی مذمت کی جائے وہ کم ہے۔ انہوں نے کہا کہ حضرت عمر بن عبدالعزیز کے مزار کی بے حرمتی پر اسلامی دنیا کے رہنماؤں اور حکمرانوں کو پوری دنیا میں مؤثر احتجاج اور بروقت اقدامات کرنے چاہئیں۔
خبر کا کوڈ: 865688