کورونا وائرس کو حقیقت تسلیم کرکے اس سے بچنے کی تدبیر اختیار کی جائیں، مرتضیٰ وہاب

اسلام ٹائمز۔ سندھ حکومت کے ترجمان اور مشیر قانون و ماحولیات و ساحلی ترقی بیرسٹر مرتضیٰ وہاب نے کہا ہے کہ کورونا وائرس کو ایک حقیقت تسلیم کرکے اس سے بچنے کی تدبیر اختیار کی جائیں، چند روز میں پاکستان میں کورونا وائرس تیزی سے پھیلا ہے۔ انہوں نے عوام سے اپیل کی کہ گھر سے نکلتے وقت ماسک پہننا نہ بھولیں کیونکہ طبی ماہرین کے مطابق ماسک پہننے سے وائرس کی منتقلی صرف پانچ فیصد رہ جاتی ہے، ماسک پہننے سے وائرس سے پچانوے فیصد تک حفاظت ہے۔

انہوں نے کہا کہ خود بھی اور دوسروں کو بھی ماسک استعمال کرنے کی تلقین کریں، اب یہ وائرس ہم سب کو متاثر کررہا ہے، یہ وائرس ہمارے گلی محلوں میں پھیل چکا ہے۔ انہوں نے مزید کہا کہ اس خطرناک وباء سے بچنے کا واحد راستہ احتیاط ہے، سندھ حکومت احتیاط برتنے کی بار بار تلقین کرتی رہی ہے، بیمار افراد کے علاوہ پچاس برس سے زیادہ عمر کے افراد اور بچے گھروں سے نہ نکلیں، ہم  اللہ تعالی سے دعاگو رہیں کہ ہمیں اس وباء سے جلد از جلد چھٹکارا ملے۔