دینی مرجعیت ہی حشد الشعبی کی بانی اور اسکی نظر تنظیم نو میں بنیادی حیثیت رکھتی ہے، فالح الفیاض

اسلام ٹائمز۔ عراقی خبررساں ایجنسی الحشد کے مطابق عراق میں جہاد کفائی پر مبنی اعلی دینی مرجعیت کے فتوے اور اس کے نتیجے میں عوامی مزاحمتی فورس حشد الشعبی کے وجود میں آنے کی چھٹی سالگرہ کے حوالے سے عراقی قومی سلامتی کے مشیر اور عراقی سرکاری افواج میں شامل عوامی مزاحمتی فورس حشد الشعبی کے کمانڈر انچیف فالح الفیاض نے کہا ہے کہ حشد الشعبی عراق کی اعلی دینی مرجعیت کے فتوے پر تشکیل پائی ہے اور اس کی تنظیم نو میں بھی اعلی دینی مرجعیت کی رائے ہی بنیادی حیثیت کی حامل ہے۔ عراقی قومی سلامتی کے مشیر نے کہا کہ عراقی اعلی دینی مرجعیت ہی حشد الشعبی کی بانی ہے اور وہی حشد الشعبی کے روحانی باپ کا درجہ بھی رکھتی ہے۔

حشد الشعبی کے کمانڈر انچیف فالح الفیاض نے عوامی مزاحمتی فورس حشد الشعبی کی تنظیم نو کے بارے میں گفتگو کرتے ہوئے کہا کہ حشد الشعبی کے قبائلی بریگیڈز کو مرکزی بریگیڈز میں ضم کرنے کے لئے ایک کمیٹی تشکیل دے دی گئی ہے جبکہ حشد الشعبی کی مکمل تنظیم نو کے لئے نیا ڈھانچہ بھی تیار کر لیا گیا ہے۔ حشد الشعبی کے کمانڈر انچیف اور عراقی قومی سلامتی کے مشیر نے اپنی گفتگو کے آخر میں کہا کہ حشد الشعبی کو نئے سرے سے منظم کر رہے ہیں جبکہ اس مقدس جہادی فورس کو کمانڈ کرنا میرے لئے انتہائی قابل فخر ہے۔

حشد الشعبی کی چھٹی سالگرہ کے حوالے سے منعقد کی گئی اس تقریب سے عراقی وزیراعظم مصطفی الکاظمی نے بھی خطاب کیا۔ انہوں نے اپنے خطاب کے دوران حشد الشعبی کے وجود میں آنے کو بین الاقوامی دہشتگرد تنظیم داعش کے خلاف جدوجہد میں ایک اہم موڑ قرار دیا اور کہا کہ آج سے 6 سال قبل، اسی دن ہماری عوام دہشتگردی کے ایک بڑے طوفان یعنی داعش کے ساتھ مقابلے کے لئے اٹھ کھڑے ہوئے تھے درحالیکہ دنیا میں بہت سے لوگ یہ سمجھتے تھے کہ ہمارا ملک سالمیت کے ساتھ اس اس عظیم مصیبت سے ہرگز چھٹکارا نہیں پا سکتا۔