اسلام ٹائمز - گلگت بلتستان میں انتخابی شیڈول کا اعلان کر دیا گیا

گلگت بلتستان میں انتخابی شیڈول کا اعلان کر دیا گیا

7 جولائی کو ریٹرننگ آفیسرز کیجانب سے پبلک نوٹس جاری کیا جائیگا۔ انتخابی امیدوار 13 سے 17 جولائی تک کاغذات نامزدگی جمع کروا سکیں گے۔ 17 جولائی کو امیدواروں کے نام شائع کیے جائینگے۔

اسلام ٹائمز۔ گلگت بلتستان میں الیکشن شیڈول کا اعلان کر دیا گیا۔ چیف الیکشن کمشنر جی بی راجہ شہباز کی جانب سے جاری نوٹیفیکیشن کے مطابق 7 جولائی کو ریٹرننگ آفیسرز کی جانب سے پبلک نوٹس جاری کیا جائے گا۔ انتخابی امیدوار 13 سے 17 جولائی تک کاغذات نامزدگی جمع کروا سکیں گے۔ 17 جولائی کو امیدواروں کے نام شائع کیے جائیں گے۔ ریٹرننگ آفیسران کی جانب سے کاغذات نامزدگی کی سکروٹنی کی آخری تاریخ 23 جولائی ہوگی۔

ریٹرننگ آفیسران کے فیصلوں کیخلاف اپیل کرنے کی آخری تاریخ 27 جولائی ہوگی۔ اپیلٹ ٹریبونل کی جانب سے اپیلوں پر عمدرآمد کرنے کی تاریخ 3 اگست مقرر کی گئی ہے۔ 4 اگست کو امیدواروں کے نظرثانی شدہ نام شائع کیے جائیں گے جبکہ 5 اگست کو کاغذات نامزدگی واپس لیے جا سکیں گے، 6 اگست کو انتخابی نشان الاٹ کیے جائیں گے اور 18 اگست کو پولنگ ہوگی۔ واضح رہے کہ صدر مملکت نے گذشتہ ماہ 18 اگست کو پول ڈے کے طور پر منظوری دی تھی، جس کے بعد الیکشن کمیشن جی بی کی جانب سے آج باقاعدہ شیڈول کا اعلان کیا گیا ہے۔