اسلام ٹائمز - فتح اور حماس کی پریس کانفرنس، مشترکہ مزاحمتی محاذ کا نیا سنگ میل ہے، اسمعیل ہنیہ

فتح اور حماس کی پریس کانفرنس، مشترکہ مزاحمتی محاذ کا نیا سنگ میل ہے، اسمعیل ہنیہ

فلسطینی خبررساں ایجنسی شہاب کیمطابق فلسطینی مزاحمتی تحریک حماس کے سیکرٹری سیاسیات نے فلسطینی مزاحمتی تحریکوں حماس اور فتح کی مشترکہ پریس کانفرنس کی حمایت کرتے ہوئے فلسطینی قوم سے سڑکوں پر نکل کر قابض صیہونی دشمن کیساتھ بھرپور مقابلے کا مطالبہ کیا ہے۔ انہوں نے پوری امتِ مسلمہ سے بھی پرزور مطالبہ کیا کہ وہ واحد فلسطینی موقف، فلسطینی قیام اور فلسطینی مزاحمتی جدوجہد کی کھل کر حمایت کرے۔

اسلام ٹائمز۔ فلسطینی خبررساں ایجنسی شہاب کے مطابق فلسطینی مزاحمتی تحریک حماس کے ڈپٹی سیکرٹری سیاسیات صالح العاروری اور فلسطینی مزاحمتی تحریک فتح کی مرکزی کمیٹی کے سربراہ جبرئیل الرجوب نے ایک مشترکہ پریس کانفرنس کے دوران مزید فلسطینی سرزمین پر اسرائیلی قبضے کے خلاف مشترکہ جدوجہد کا اعلان کیا ہے۔ حماس کے سیکرٹری سیاسیات اسمعیل ہنیہ نے اس حوالے سے میڈیا کے ساتھ گفتگو کرتے ہوئے کہا ہے کہ ہماری قوم نے آج واحد قومی موقف کی جانب ایک مثبت قدم کا مشاہدہ کیا ہے۔ انہوں نے کہا کہ یہ مثبت قدم واحد قومی موقف اور "صدی کی ڈیل" و "الحاقی منصوبے" سمیت مسئلۂ فلسطین کو سرے سے ختم کرنے پر مبنی دشمن کی سازشوں کے خلاف واحد فلسطینی مزاحمتی محاذ کی تشکیل کے لئے اٹھایا گیا ہے۔

فلسطینی مزاحمتی تحریک حماس کے سیکرٹری سیاسیات اسمعیل ہنیہ نے تاکید کرتے ہوئے کہا کہ آج غزہ میں منعقد ہونے والی متحدہ ریلی اور لبنان و دنیا کے دوسرے مقامات پر ہونے والی عوامی سرگرمیاں (دونوں مزاحمتی تحریکوں کے) مشترکہ تعامل کی ایک مثال ہے۔ اسمعیل ہنیہ نے کہا کہ میں آج کی مشترکہ قومی پریس کانفرنس جو قومی احساس ذمہ داری کی غمازی کرتی ہے، کی مکمل حمایت کرتا ہوں اور پوری قوم کو سڑکوں پر نکل کر قابض صیہونی دشمن کے خلاف بھرپور مقابلے کی دعوت دیتا ہوں۔ انہوں نے کہا کہ آج ہم آزادی کے حصول کے مرحلے میں داخل ہو چکے ہیں جبکہ اس مرحلے کے دوران پوری امتِ اسلامی سے میرا مطالبہ ہے کہ وہ فلسطینی قوم کے واحد قومی موقف، قیام اور مزاحمتی جدوجہد کی کھل کر حمایت کرے۔