اسلام ٹائمز - ایک سال سے عدالتوں کے چکر لگا رہے ہیں، شاہد خاقان

ایک سال سے عدالتوں کے چکر لگا رہے ہیں، شاہد خاقان

عدالت میں پیشی کے بعد میڈیا سے گفتگو کرتے ہوئے سابق وزیراعظم کا کہنا تھا کہ نیب کو کسی کی سننی نہیں ہے، ملک کو تباہ کرنا ہے۔ سیاست دانوں کو دبانے کے لیے نیب استعمال ہوتا ہے۔

اسلام ٹائمز۔ سابق وزیراعظم شاہد خاقان عباسی کا کہنا ہے کہ کچھ شرم کریں، یوں ملک نہیں چلتا، ایک سال سے عدالتوں کے چکر لگا رہے ہیں، نیب کو کسی کی سننی نہیں ہے، ملک کو تباہ کرنا ہے۔ احتساب عدالت میں پیشی کے بعد میڈیا سے گفتگو کرتے ہوئے سابق وزیراعظم شاہد خاقان نے کہا کہ 16جولائی 2019ء کو گرفتاری کے وارنٹ جاری ہوئے تھے اور آج ایک مرتبہ پھر نیب کورٹ اسلام آباد میں پیشی تھی، جبکہ میں گزشتہ ایک سال سے ہر سوال کا جواب دے رہا ہوں۔ شاہد خاقان عباسی نے بتایا کہ الزام لگانا بہت آسان ہے، سیاست دانوں کو دبانے کے لیے نیب استعمال ہوتا ہے، اس ادارے نے کسی کی سننی نہیں ہے، ملک کو تباہ کرنا ہے۔ انہوں نے کہا کہ راجا پرویز اشرف کیس سے بری ہو گئے، گیارہ بارہ سال بدنامی ہوئی ذمہ دار کون ہے؟، شاہد خاقان نے کہا کہ آپ تفتیش کریں، شواہد لائیں پھر عدالت میں آئیں، یہ پہلے ہی گرفتار کر لیتے ہیں۔

سابق وزیراعظم نے کہا کہ آج کوئی شخص ملک میں سرمایہ کاری نہیں کر رہا ہے، حکومت ناکام ہو چکی، حکومت نہیں چل رہی، ہر لمحہ ملک پر بھاری ہے۔ انہوں نے کہا کہ میں حامی ہوں کہ حکومت 5 سال پورے کرے کیا مگر کیا ملک اس حکومت کا متحمل ہو سکتا ہے؟ شاہد خاقان نے کہا کہ عمران خان کہتے ہیں مائنس ون کی بات ہو رہی ہے بتائیں ان کی پارٹی میں یہ کون چاہتا ہے۔ شاہد خاقان نے کہا کہ ایک سال سے ہم عدالتوں کے چکر لگا رہے ہیں،نیب نے ریمانڈ لیا، جوڈیشل ریمانڈ ہوا، کچھ شرم کریں، یوں ملک نہیں چلتا ہے۔ انہوں نے بتایا کہ اسلام آباد ہائیکورٹ نے ہیومن رائٹس کے ایشو پر ضمانت دی ہے۔

دوسری جانب احتساب عدالت میں پیشی کے دوران جج اعظم خان نے نیب کو شاہد خاقان عباسی کے خلاف تفتیش مکمل کرنے کی ہدایت دیتے ہوئے ایل این جی کیس میں 6 اگست تک حتمی ریفرنس دائر کرنے کا حکم دیا ہے اور ریمارکس دیئے ہیں کہ ضمنی ریفرنس دائر کرنے کے لیے یہ آخری مہلت ہے۔ ایل این جی ریفرنس کی سماعت کے دوران نیب نے ضمنی ریفرنس دائر کرنے کے لیے 4 ہفتے کا وقت مانگ لیا، اس موقع پر شاہد خاقان عباسی، عظمیٰ عادل سمیت دیگر ملزمان عدالت میں پیش ہوئے۔ تفتیشی افسر نے عدالت کو بتایا کہ کچھ نیا ریکارڈ ملا ہے جس کا جائزہ لے رہے ہیں، نیب پراسیکیوٹر نے کہا کہ ضمنی ریفرنس کی تیاری آخری مراحل میں ہے، ریفرنس مکمل کرنے کیلئے تین سے چار ہفتے درکار ہوں گے۔ وکیل شاہد خاقان عباسی نے عدالت کو بتایا کہ دو سال تک نیب مختلف سوالات ہمیں دیتا رہا ہے، ساڑھے 6 ماہ جیل میں رکھنے کے باوجود ریفرنس دائر نہیں کیا جاسکا، ہمارے ساتھ ایسا تماشا نہ لگایا جائے،جب تک نیب ریفرنس دائر نہیں کرتا سماعت ملتوی کی جائے۔