0
Saturday 11 Jul 2020 17:05

حکومت چار، پانچ ماہ میں خود ہی ہینڈز اپ کردے گی، سراج الحق

حکومت چار، پانچ ماہ میں خود ہی ہینڈز اپ کردے گی، سراج الحق
اسلام ٹائمز۔ امیر جماعت اسلامی پاکستان سینیٹر سراج الحق نے کہا ہے کہ حکومت زیادہ دیر چلنے والی نہیں، چار، پانچ ماہ میں یہ خود ہی ہینڈز اپ کردے گی، حکومت زمین بوس ہوچکی ہے، حکومتی وزراء خود اپنی ناکامیوں کا اعتراف کر رہے ہیں، چینی کمیشن کی رپورٹ آنے کے بعد ذمہ داروں کو گرفتار کرنا ضروری تھا، آج آٹا چینی اور پٹرول مافیا زیادہ طاقتور ہوچکا ہے، حکومت میڈیا کا سامنا نہیں کرسکتی۔ نیب کی کارکردگی مایوس کن اور نیب خود قابل احتساب ہے، نون لیگ نے کبھی اپوزیشن کا کردار ادا نہیں کیا۔ ان خیالات کا اظہار انہوں نے سوات میں پریس کانفرنس سے خطاب کرتے ہوئے کیا، اس موقع پر ضلعی امیر محمد امین بھی موجود تھے۔ سراج الحق کا کہنا تھا کہ یہ بات نہایت تکلیف دہ ہے کہ حکومت عوام کو دھوکہ دینے میں کامیاب ہوگئی، ریا ست کو ماں کا کردار ادا کرنا چاہئے مگر جب سے حکومت آئی ہے ہر طبقہ زندگی کے لوگ رو رہے ہیں، احتجاج کر رہے ہیں اور حکومت کو بددعائیں دے رہے ہیں۔

سراج الحق نے کہا کہ ایک کروڑ 70 لاکھ نوجوان بے روزگار ہیں، مہنگائی، بے روز گاری اور غربت نے عوام کی زندگی اجیرن کردی ہے، حکومت نے ایک کروڑ نوجوانوں کو نوکریاں اور پچاس لاکھ کو گھر دینے کا وعدہ کیا تھا مگر 22 ماہ گزر جانے کے باوجود حکومت نے اپنا ایک بھی وعدہ پورا نہیں کیا۔ لوگ دو وقت کے کھانے کے محتاج ہوگئے ہیں، حکومت نے اپنی نااہلی سے اداروں کو تباہ کردیا ہے، کوئی ایک ادارہ ایسا نہیں جہاں سے کوئی خیر کی خبر آتی ہو۔ انہوں نے کہا کہ عوام کا حکومت پر سے اعتماد اٹھ چکا ہے، حکمرانوں نے عوام کو جو سبز باغ دکھائے تھے ان کی اصلیت سامنے آچکی ہے، اب لوگ ان حکمرانوں کے کسی وعدے پر یقین کرنے کو تیار نہیں، لوگ لوڈ شیڈنگ کی وجہ احتجاج پر مجبور ہیں۔ سینیٹر سراج الحق نے مزید کہا کہ حکومت کی ناکام خارجہ پالیسی کی وجہ سے بھارت سلامتی کونسل کا غیر مستقل رکن منتخب ہوا، حکومت کی کشمیر پالیسی بری طرح ناکام ہوگئی ہے بلکہ اگر یہ کہا جائے کہ حکومت کی کشمیر کے حوالے سے کوئی پالیسی ہی نہیں تھی تو زیادہ بہتر ہوگا۔
خبر کا کوڈ : 873808
رائے ارسال کرنا
آپ کا نام

آپکا ایمیل ایڈریس
آپکی رائے

ہماری پیشکش