استور میں خوفناک آتشزدگی، پورا گاوں جل کر خاکستر

اسلام ٹائمز۔ گلگت بلتستان کے ضلع استور کے سرحدی علاقے منی مرگ میں خوفناک آتشزدگی کے نتیجے میں پورا گائوں جل کر خاکستر ہوگیا۔ اتوار اور پیر کی درمیانی شب ایک بجے مپنو گائوں میں واقعہ پیش آیا۔ رات ایک بجے کے قریب اچانک آگ بھڑک اٹھی اور دیکھتے ہی دیکھتے پورے گائوں کو لپیٹ میں لے لیا۔ آتشزدگی کے نتیجے میں 30 سے زائد گھر جل کر خاکستر ہوگئے، آگ کی شدت اتنی زیادہ تھی کہ کئی کلومیٹر تک شعلے نظر آئے۔ مقامی لوگوں نے اپنی مدد آپ کے تحت آگ بجھانے کی کوشش کی لیکن اندھیرا ہونے کی وجہ سے ناکام رہے اور پورا گائوں راکھ کا ڈھیر بن گیا۔

واقعے میں کوئی جانی نقصان نہیں ہوا۔ مقامی ذرائع کے مطابق گائوں کے لوگ اپنے مال مویشی لے کر تھوڑے فاصلے پر چراگاہ گئے ہوئے تھے اور گائوں خالی تھا، اس لیے کوئی جانی نقصان نہیں ہوا۔ تاہم آتشزدگی کے نتیجے میں کروڑوں کا مالی نقصان ہوا۔ واقعے کی وجہ ابھی تک سامنے نہیں آئی۔ دوسری جانب گورنر گلگت بلتستان راجہ جلال حسین مقپون نے آتشزدگی کے واقعہ پر افسوس کا اظہار کرتے ہوئے انتظامیہ کو احکامات جاری کیے ہیں کہ وہ متاثرین کی مدد کیلئے فوری اقدامات کرے۔