QR Code

شام، امریکہ کیلئے جاسوسی کرنیوالے مزید 2 دہشتگرد گرفتار

30 Jul 2020 23:58

شامی سرکاری خبررساں ایجنسی شانا نے خبر دی ہے کہ امریکی فورسز کیلئے کام کرنیوالی دہشتگرد تنظیم "مغاویر الثورہ" کے مزید 2 دہشتگرد گرفتار کر لئے گئے ہیں۔ ابتدائی تفتیش کے دوران ان دہشتگردوں نے اعتراف کیا ہے کہ التنف کے علاقے میں قائم غیر قانونی امریکی فوجی اڈے سے انہیں شامی افواج کی جاسوسی کے لئے بھیجا گیا تھا۔

اسلام ٹائمز۔ شامی سرکاری خبررساں ایجنسی شانا کے مطابق شامی سکیورٹی فورسز نے امریکہ کے زیر کنٹرول کام کرنے والے "مغاویر الثورہ" نامی دہشتگرد گروہ کے مزید 2 دہشتگرد گرفتار کر لئے ہیں۔ تفصیلات کے مطابق شامی صوبے حمص کے شہر تدمر سے تعلق رکھنے والی شامی سکیورٹی فورسز نے مصدقہ اطلاعات اور دہشتگرد گروہوں کے خلاف جاری انٹیلیجنس آپریشن کے مطابق صوبہ حمص کے جنوبی شہر القریتین سے 2 دہشتگرد گرفتار کر لئے ہیں۔ ذرائع کے مطابق ابتدائی تحقیقات میں ان دہشتگردوں نے اعتراف کیا ہے کہ انہوں نے التنف میں واقع غیر قانونی امریکی فوجی اڈے کے اندر تربیت پائی ہے جبکہ وہ شامی فوجی چھاؤنیوں سے بھی کئی مرتبہ اطلاعات حاصل کر کے امریکی فورسز کے حوالے کر چکے ہیں۔
 

خبر کا کوڈ: 877591