0
Tuesday 4 Aug 2020 14:12

مسئلہ کشمیر پر پاکستان کی تمام سیاسی جماعتیں متحد ہیں، شاہ محمود قریشی

مسئلہ کشمیر پر پاکستان کی تمام سیاسی جماعتیں متحد ہیں، شاہ محمود قریشی
اسلام ٹائمز۔ وزارت خارجہ میں مقبوضہ کشمیر کی صورتحال پر آل پارٹیز کانفرنس ہوئی جس میں تمام سیاسی جماعتوں کو مقبوضہ وادی میں انسانی حقوق کی سنگین خلاف ورزیوں کی صورتحال سے متعلق بریفنگ دی گئی۔ کشمیر کی صورتحال پر وزارت خارجہ میں آل پارٹیز کانفرنس ہوئی جس میں اسپیکر قومی اسمبلی اسد قیصر، چیئرمین سینٹ صادق سنجرانی، وزیر اطلاعات سینیٹر شبلی فراز، وفاقی وزیر قانون بیرسٹر فروغ نسیم، وزیر امور کشمیر علی امین گنڈا پور، چیئرمین کشمیر کمیٹی شہریار آفریدی، علی محمد خان، وزیر مملکت برائے پارلیمانی امور، معاون خصوصی برائے قومی سلامتی معید یوسف، وفاقی وزیر برائے بین الصوبائی رابطہ ڈاکٹر فہمیدہ مرزا، سینیٹر مشاہد حسین سید، فرخ حبیب، سینیٹر راجہ ظفر الحق، راجہ پرویز اشرف، سید نوید قمر، سینیٹر شیری رحمان سمیت دیگر نے شرکت کی۔

وزیر خارجہ شاہ محمود قریشی نے تمام سیاسی جماعتوں کے رہنماؤں کو مقبوضہ جموں و کشمیر میں جاری انسانی حقوق کی سنگین خلاف ورزیوں اور خطے میں امن و امان کی صورتحال کے حوالے سے مفصل بریفنگ دیتے ہوئے کہا کہ تمام کشمیری گذشتہ سال 5 اگست کو بھارت کی جانب سے مقبوضہ کشمیر میں کیے گئے غیرآئینی اور یکطرفہ اقدامات کو یکسر مسترد کر چکے ہیں۔ شاہ محمود قریشی کا کہنا تھا کہ پاکستان نے بھارت کی مقبوضہ جموں و کشمیر میں جاری انسانی حقوق کی خلاف ورزیوں کو ہر بین الاقوامی فورم پر بےنقاب کیا، بھارت سرکار کی ہندتوا پالیسی نہ صرف کشمیریوں بلکہ پورے خطے کے امن و امان کے لیے خطرات کا باعث ہے، بھارت، مقبوضہ کشمیر  میں ڈومیسائل قوانین میں تبدیلی کر کے آبادیاتی تناسب کو تبدیل کرنا چاہتا ہے جو بین الاقوامی قوانین کی صریحاً خلاف ورزی ہے۔

وزیر خارجہ کا کہنا تھا کہ آج پاکستان کی تمام سیاسی جماعتیں مسئلہ کشمیر پر متحد ہیں، آر ایس ایس کی سوچ پر گامزن بی جے پی کی سرکار نے، اپنی ہندتوا سوچ کے سبب، نہ صرف کشمیریوں بلکہ بھارت کے اندر بسنے والی اقلیتوں کے دلوں میں نفرت کے بیج بوئے، آج پوری دنیا کے سامنے بھارت سرکار کا اصل چہرہ بےنقاب ہوچکا ہے جبکہ آج دنیا بھارت کی منافرت پسند پالیسیوں کو تنقید کا نشانہ بنا رہی ہے۔ آل پارٹیز کانفرنس میں شاہ محمود قریشی نے کہا کہ پاکستان کی پوری قوم، تمام سیاسی جماعتیں، سیاسی اور عسکری قیادت کشمیر کے معاملے پر یکساں موقف کی حامل ہیں، پاکستان اس وقت تک اپنے کشمیری بھائیوں کی حمایت جاری رکھے گا جب تک انہیں ان کا جائز حق، حق خودارادیت، مل نہیں جاتا۔

وزیر خارجہ شاہ محمود قریشی کہتے ہیں آر ایس ایس کی سوچ رکھنے والی سرکاری بابری مسجد کو شہید کرکے رام مندر کی بنیاد رکھنے جارہی ہے، پوری دنیا نے ہندوتوا پالیسی کو دیکھ لیا، تمام امت مسلمہ کشمیریوں سے اظہار یکجہتی کیلئے یوم استحصال منعقد کریں، حکومت نے واضح پروگرام منعقد کیا ہے، اپوزیشن جماعتیں بھی ایک ہوجائیں، انشا اللہ کشمیریوں کو فتح نصیب ہوگی پوری قوم کشمیریوں کے ساتھ کھڑی ہے۔

وزیرخارجہ شاہ محمود قریشی کا کہنا ہے کہ کنسٹرکشن انڈسٹری میں زبردستی پیشرفت ہوگئی ہے، ملک کے تیرہ بڑے بلڈرز اور ڈیویلپلرز نے فیصلہ کیا ہے کہ اگلے تین سے چار ماہ میں 1300 ارب انوسٹ کرنے کا ارادہ رکھتے ہیں، اس سے اسٹیل سمیت دیگر صنعتوں کو فروغ ملے گا۔
خبر کا کوڈ : 878280
رائے ارسال کرنا
آپ کا نام

آپکا ایمیل ایڈریس
آپکی رائے

منتخب
ہماری پیشکش