اسلام ٹائمز - ممبئی میں طوفانی بارشوں نے تباہی مچا دی

بھارتی میڈیا کے مطابق ممبئی کے کچھ علاقوں میں 300 ملی میٹر بارش ریکارڈ کی گئی، ممبئی میں طوفانی بارشوں سے متعلق حکام نے ریڈ الرٹ جاری کر رکھا ہے۔

اسلام ٹائمز۔ بھارت کے شہر ممبئی میں طوفانی بارشوں نے تباہی مچا دی، 107 کلومیٹر فی گھنٹہ کی رفتار سے چلنے والی طوفانی ہواوں نے نظام زندگی درہم برہم کر دیا۔ بھارتی میڈیا کے مطابق ممبئی کے کچھ علاقوں میں 300 ملی میٹر بارش ریکارڈ کی گئی، ممبئی میں طوفانی بارشوں سے متعلق حکام نے ریڈ الرٹ جاری کر رکھا ہے۔ ممبئی میں محکمہ موسمیات کے مطابق آج بھی بارش جاری رہنے کا امکان ہے، جبکہ بارش سے ہونیوالے حادثات میں 4 افراد ہلاک اور کئی لاپتہ ہو گئے۔ مہاراہشٹرا کے مختلف علاقوں میں سیلابی پانی میں گھرے افراد کو کشتیوں کے ذریعے ریسکیو کئے جانے کا سلسلہ جاری ہے، ریاست کے وزیراعلیٰ نے شہریوں سے گھروں میں رہنے کی اپیل کر دی ہے۔ ممبئی میں بارش اور طوفانی ہواؤں کے بعد کئی علاقوں میں بجلی منقطع ہو گئی، جبکہ ممبئی اسٹاک ایکس چینج کا سائن بورڈ گر گیا تاہم اسے زمین پر گرنے سے بچانے کے لئے فائر بریگیڈ کی مدد لی گئی تاکہ جانی و مالی نقصان سے بچا جا سکے۔ واضح رہے کہ ممبئی میں جس موسمیاتی سسٹم سے بارش ہوئیں، وہی سسٹم آج اور کل کراچی، حیدرآباد میں بارشوں کا باعث بنے گا۔