QR Code

وزیراعظم جمعرات کو بی آر ٹی کا افتتاح کریں گے، محمود خان

12 Aug 2020 00:06

سئنیر صحافیوں سے گفتگو کرتے ہوئے وزیراعلیٰ خیبر پختونخوا کا کہنا تھا کہ اگرچہ منصوبے کی تکمیل میں تاخیر ہوئی تاہم دیر آید درست آید کی مثال اس منصوبے کی تکمیل پشاور کے باسیوں کیلئے ایک بڑی خوشخبری اور صوبائی حکومت کی بڑی کامیابی ہے۔

اسلام ٹائمز۔ وزیراعلیٰ خیبر پختونخوا محمود خان نے اعلان کیا ہے کہ 13 اگست 2020 بروز جمعرات پشاور بس ریپڈ ٹرانزٹ منصوبے کا باقاعدہ افتتاح کیا جائے گا اور وزیراعظم پاکستان عمران خان دن 3:00 بجے مذکورہ منصوبے کا باضابطہ افتتاح کریں گے۔ یہ اعلان اُنہوں نے منگل کے روز وزیراعلیٰ ہاﺅس پشاور میں سنیئر صحافیوں کے ساتھ ایک نشست کے دوران کیا۔ بی آر ٹی منصوبے کو پی ٹی آئی حکومت کا ایک فلیگ شپ منصوبہ اور پشاور کے شہریوں کیلئے ایک بڑا تحفہ قرار دیتے ہوئے وزیراعلیٰ نے کہا کہ اگرچہ منصوبے کی تکمیل میں تاخیر ہوئی تاہم دیر آید درست آید کی مثال اس منصوبے کی تکمیل پشاور کے باسیوں کیلئے ایک بڑی خوشخبری اور صوبائی حکومت کی بڑی کامیابی ہے۔ اُنہوں نے کہا کہ گزشتہ صوبائی حکومت کے دور میں سابق وزیراعلیٰ پرویز خٹک نے اس شہر کے عوام کو جدید اور معیاری سفری سہولیات فراہم کرنے کیلئے اس منصوبے کا آغاز کیا تھا جس کی تکمیل ہمارے ہی دور حکومت میں مکمل ہو گئی۔

وزیراعلیٰ نے صحافیوں پر زور دیا کہ وہ اس منصوبے کے فوائد کے بارے میں عوام کو آگاہی دینے میں اپنا کردار ادا کریں۔ اُنہوں نے مزید کہا کہ بی آر ٹی منصوبے کی طرح صوبے میں دیگر میگا منصوبوں پر مقررہ ٹائم لائنز کے مطابق کام جاری ہے، جن کی تکمیل سے صوبے میں ترقی اور خوشحالی کے نئے دور کا آغاز ہو جائے گا۔ وزیراعلیٰ نے بی آر ٹی منصوبے پر دن رات ایک کرکے کام کرنے پر اپنے پرنسپل سیکرٹری، سیکرٹری ٹرانسپورٹ، ڈی جی پی ڈی اے، چیف ایگزیکٹیو آفیسر ٹرانس پشاور اور دیگر حکام کے کردار کی تعریف کی۔ 

خبر کا کوڈ: 879736