اسلام ٹائمز۔ وفاقی وزیر امور کشمیر و گلگت بلتستان علی امین گنڈاپور نے کہا ہے کہ جی بی کو صوبہ بنانے میں وزارت خارجہ اور آزاد کشمیر کو تحفظات ہیں، کیونکہ ہم نے خود اقوام متحدہ کی سلامتی کونسل میں جی بی کو کشمیر کا حصہ دکھایا ہوا ہے۔ نجی ٹی سے گفتگو کرتے ہوئے انہوں نے کہا کہ جی بی کے انتخابات اکتوبر میں ہوں گے، ہماری تیاریاں مکمل ہیں۔ نگران کابینہ کی تقرری میں کوئی پیسے نہیں لئے گئے، گلگت بلتستان قانون کے مطابق وزیر اعظم بطور چیئرمین کونسل کو نگران حکومت تشکیل دینے کا اختیار حاصل ہے۔ انہوں نے کہا کہ جی بی نگران کابینہ میں تمام مسالک کو نمائندگی دی گئی ہے، قابل لوگوں کو شامل کیا گیا ہے۔ میں نے جی بی میں بہت سی محرومیاں دیکھی ہیں، یہ محرومیاں ہمارے دور میں ہی حل ہوں گی۔