اسلام ٹائمز - یمن، القاعدہ کے ہاتھوں سولی پر چڑھائے جانیوالے ڈاکٹر کا کلینک بھی تباہ

یمن، القاعدہ کے ہاتھوں سولی پر چڑھائے جانیوالے ڈاکٹر کا کلینک بھی تباہ

ترک خبررساں ایجنسی ایناڈولو کیمطابق یمنی صوبے البیضاء میں القاعدہ کے ہاتھوں تباہ کیا جانیوالا کلینک یمنی ڈاکٹر "مطہر الیوسفی" سے ہی متعلق تھا جنہیں انصاراللہ کے ہاتھوں القاعدہ کی حالیہ شکست پر جاسوسی کا الزام عائد کرتے ہوئے القاعدہ کیطرف سے سولی پر چڑھا دیا گیا تھا۔

اسلام ٹائمز۔ سعودی فوجی اتحاد کے شانہ بشانہ یمنی عوامی مزاحمتی فورس انصاراللہ کے ساتھ برسرپیکار عالمی دہشتگرد تنظیم القاعدہ نے یمن کے مرکزی صوبے البیضاء کے اندر واقع اُس ڈاکٹر کا کلینک بھی دھماکہ خیز مواد کے ذریعے تباہ کر دیا ہے جسے ایک ہفتہ قبل ہی جاسوسی کے الزام میں سزائے موت دیدی گئی تھی۔ ترک خبررساں ایجنسی ایناڈولو کے مطابق یمنی صوبے البیضاء میں القاعدہ کے ہاتھوں تباہ کیا جانے والا کلینک یمنی ڈاکٹر "مطہر الیوسفی" سے ہی متعلق ہے جنہیں انصاراللہ کے ہاتھوں القاعدہ کی حالیہ شکست پر جاسوسی کا الزام عائد کرتے ہوئے القاعدہ کی طرف سے سولی پر چڑھا دیا گیا تھا۔ تفصیلات کے مطابق کچھ روز قبل ہی یمنی مزاحمتی تحریک انصاراللہ کی ایک وسیع کارروائی کے نتیجے میں البیضاء پر قابض دہشتگرد تنظیم القاعدہ کو اپنی پوزیشنز سے عقب نشینی کرتے ہوئے شہر "صومعہ" میں پناہ لینا پڑی تھی۔

واضح رہے کہ بین الاقوامی حمایت یافتہ دہشتگرد تنظیم القاعدہ کی جانب سے دھماکہ خیز مواد کے ذریعے مسمار کیا جانے والا کلینک تمام ایام میں کھلا رہتا تھا اور وہاں روزانہ کے حساب سے دسیوں مریض رجوع کرتے تھے۔ یاد رہے کہ یمنی مزاحمتی تحریک انصاراللہ کی جانب سے گزشتہ چند سالوں سے جاری وسیع آپریشن کے باوجود البیضاء، مشرقی مأرب اور جنوبی ابین سمیت متعدد صوبے تاحال عالمی دہشتگرد تنظیم داعش کے کنٹرول میں باقی ہیں۔ رپورٹ کے مطابق یمنی سکیورٹی فورسز کی جانب سے گزشتہ 5 سال کے عرصے میں یمن کے مرکزی صوبے البیضاء کے اندر القاعدہ کی جانب سے بڑی تعداد میں ہونے والی دہشتگردانہ کارروائیوں کو ناکام بنایا گیا ہے۔ یمنی وزات داخلہ کی جانب سے جاری کئے جانے والے اعداد و شمار کے مطابق داعش و القاعدہ کے بین الاقوامی حمایت یافتہ دہشتگردوں نے جنوری 2015ء تا مئی 2020ء، صرف اس ایک یمنی صوبے کے اندر ہی 327 سے زائد دہشتگردانہ کارروائیاں انجام دی ہیں جن میں مسلح گھات لگانا، ٹارگٹ کلنگ اور بم نصب کرنے کی کارروائیاں بھی شامل ہیں۔