برینٹن ٹیرنٹ کو عمر قید کی سزا سنا دی گئی

اسلام ٹائمز۔ نیوزی لینڈ کی مساجد میں 51 نمازیوں کو شہید کرنیوالے دہشت گرد برینٹن ٹیرنٹ کو عمر قید کی سزا سنا دی گئی، ملزم تاحیات ضمانت نہیں کرا سکے گا، نیوزی لینڈ کی تاریخ میں پہلی بار کسی ملزم کو بغیر پیرول کے عمر قید کی سزا سنائی گئی ہے۔ نیوزی لینڈ کی عدالت نے کرائسٹ چرچ سانحے کے مجرم برینٹن ٹیرنٹ کو معافی کے حق کے بغیر عمر قید کی سزا سنا دی۔ نیوزی لینڈ میں تاریخ میں پہلی مرتبہ کسی مجرم کو ایسی سزا سنائی گئی ہے۔ عدالت میں جج کیمرون مینڈر نے اپنا فیصلہ سناتے ہوئے کہا کہ برینٹن ٹارنٹ کا عمل غیر انسانی تھا اور اس نے کسی پر رحم نہیں دکھایا، جج نے ملزم کو کہا کہ تمہارا جرم اس قدر گھناؤنا ہے کہ اگر تم کو قید میں موت آ جائے تو بھی تمہاری سزا پوری نہیں ہو گی۔

29 سالہ برینٹن ٹیرنٹ نے عدالت میں پہلے صحت جرم سے انکار کیا لیکن بعد میں اپنے جرم کا اعتراف کر لیا، برینٹن ٹیرنٹ نے عدالت میں کہا کہ اس نے نہ صرف 51 افراد کو قتل کیا بلکہ اس کے علاوہ 40 مزید افراد کو قتل کرنے کی کوشش کر رہا تھا۔ واضح رہے کہ گزشتہ برس نیوزی لینڈ کی دو مساجد میں 51 افراد کو قتل کرنے والے برینٹن ٹیرنٹ کے خلاف مقدمے کی سماعت کے دوران کمرہ عدالت میں حملے میں ہلاک ہونے والوں کے لواحقین اور زخمی ہونے والے افراد نے حملہ آور کا سامنا کیا اور بیانات دیے۔ اس دوران کمرہ عدالت میں رقت آمیز مناظر دیکھنے میں آئے، کچھ متاثرین بات کرتے ہوئے رو پڑے اور ان کے لیے اپنے جملے مکمل کرنا مشکل ہو جاتا لیکن وہ ٹرینٹ کو یہ باور کرواتے رہے کہ یہ آنسو تمہارے لیے نہیں ہیں۔