اسلام ٹائمز - منصور ہادی مأرب میں القاعدہ سے مدد پر مبنی اپنی بزدلانہ حکمت عملی ترک کر دیں، حسین العزی

منصور ہادی مأرب میں القاعدہ سے مدد پر مبنی اپنی بزدلانہ حکمت عملی ترک کر دیں، حسین العزی

ٹوئٹر پر جاری ہونیوالے اپنے ایک پیغام میں یمن کے ڈپٹی وزیر خارجہ نے اس بات پر زور دیا ہے کہ صوبہ مأرب میں منصور ہادی کیجانب سے القاعدہ سے مدد لینے کا اقدام نہ صرف کسی کے مفاد میں نہیں بلکہ اس سے پیدا ہونیوالے بحران کے بُرے اثرات تمام فریقوں کو اپنی لپیٹ میں لے لیں گے۔

اسلام ٹائمز۔ یمنی ڈپٹی وزیر خارجہ حسین العزی نے یمن کے مرکزی صوبے مأرب کے اندر منصور ہادی کی مستعفی یمنی حکومت کی جانب سے بین الاقوامی حمایت یافتہ دہشتگرد تنظیم "القاعدہ" کی تعیناتی کو انتہائی خطرناک اقدام قرار دیا ہے۔ ٹوئٹر پر جاری ہونے والے اپنے ایک پیغام میں یمنی ڈپٹی وزیر خارجہ نے اس بات پر زور دیا ہے کہ صوبہ مأرب کے اندر القاعدہ سے مدد لینے کا اقدام نہ صرف کسی کے مفاد میں نہیں بلکہ اس سے پیدا ہونے والے انسانی بحران کے بُرے اثرات تمام فریقوں کو اپنی لپیٹ میں لے لیں گے۔ حسین العزی نے اپنے ٹوئٹر پیغام میں مزید لکھا کہ (مستعفی و سابق یمنی صدر) ہادی اور (ان کی) اصلاح پارٹی کو چاہئے کہ وہ اپنی اس بزدلانہ حکمت عملی سے ہاتھ اٹھاتے ہوئے اپنی کج فکری کو مزید پھیلنے سے روک دیں۔

واضح رہے کہ جاری ہفتے کی ابتداء سے یمن کے مرکزی صوبے مأرب پر قابض سابقہ و مستعفی حکومت نے یمنی عوام کے خلاف مسلط کردہ جنگ میں توسیع کے لئے القاعدہ کے سینکڑوں دہشتگردوں سے مدد لینا شروع کر رکھی ہے۔ یمنی میڈیا کے مطابق بین الاقوامی حمایت یافتہ دہشتگرد تنظیم القاعدہ کے سینکڑوں مسلح دہشتگرد اصلاح پارٹی کی چھاؤنیوں میں تعینات کر دیئے گئے ہیں۔ یاد رہے کہ یمنی صوبوں ابین، شبوہ، حضرموت اور بیضاء پر تاحال القاعدہ کا کنٹرول باقی ہے جبکہ ان علاقوں پر قابض القاعدہ کے دہشتگردوں کی جانب سے انصاراللہ یمن کے خلاف مستعفی یمنی حکومت کی مدد کے لئے مسلح دہشتگردوں کو صوبہ مأرب میں بھیجا جا رہا ہے۔