ٹرمپ امریکی تجوریاں بھرنے کیلئے ہمارے خطے کو اسلحہ بیچنے کی سرتوڑ کوشش کر رہے ہیں، جواد ظریف

اسلام ٹائمز۔ ایرانی وزیر خارجہ محمد جواد ظریف نے ٹوئٹر پر جاری ہونے والے اپنے پیغام میں مشرق وسطیٰ کے ممالک کو اسلحہ بیچنے کے امریکی ہتھکنڈوں کی جانب اشارہ کرتے ہوئے لکھا ہے کہ باوجود اس کے کہ ڈونلڈ ٹرمپ "اپنی خوبصورت کمپنیوں" کی تجوریاں بھرنے کی خاطر امریکہ کی جنگی پیاس کا کھلے بندوں اعتراف کرتے ہیں؛ اس وقت وہ "اپنے خوبصورت فوجی سازوسامان" کو ہمارے خطے کے اندر بیچنے کے لئے سرتوڑ کوششوں میں مصروف ہیں۔ محمد جواد ظریف نے اپنے پیغام میں لکھا کہ ہم یہ سب سمجھتے ہیں۔ انہوں نے لکھا کہ وہ (ٹرمپ) سمجھتے ہیں کہ سرد جنگ تجارت کے لئے اچھی ہے لیکن "گرم جنگ" نہیں۔ انہوں نے اپنے پیغام کے آخر میں لکھا کہ جنگ بُری چیز ہے، اور بس!