موٹروے زیادتی کیس میں اہم پیشرفت، مرکزی ملزم کی شناخت ہوگئی، پولیس ذرائع

اسلام ٹائمز۔ موٹروے زیادتی کیس میں بڑی پیشرفت، مرکزی ملزم کا ڈین اے میچ ہوگیا، ملزم کی شناخت عابد علی کے نام سے کرلی گئی ہے۔ پولیس ذرائع کے مطابق ملزم کا پہلے ہی کریمنل ریکارڈ موجود ہے، ملزم کا ڈی این اے 2013ء کے ڈیٹا بیس سے میچ ہوا، خاتون کے لباس سے ڈی این اے میچ ہوا، ملزم عابد ملہی فورٹ عباس کا رہائشی ہے، متاثرہ خاتون کے نمونے کریمنل ڈیٹا بیس سے میچ ہوئے، کریمنل ڈیٹا بیس میں ملزم عابد ملہی 2013ء سے موجود ہے، ملزم عابد ملہی کو تاحال گرفتار نہیں کیا گیا، ملزم کی گرفتاری کیلئے سی ٹی ڈی کی ٹیمیں چھاپے مار رہی ہیں۔
 
وزیراعلٰی کی زیر صدارت موٹروے واقعہ کی تحقیقاتی کمیٹی کا اجلاس ہوا، جس میں عثمان بزدار نے کمیٹی کو تحقیقات جلد مکمل کرنے کی ہدایت کر دی گئی۔ وزیراعلٰی پنجاب کا کہنا تھا موٹر وے پولیس کی تعیناتی تک پنجاب پولیس فرائض سرانجام دے گی، دلخراش واقعہ میں ملوث ملزمان سزا سے نہیں بچ پائیں گے۔ عثمان بزدار نے کہا ہے کہ متاثرہ خاندان کو انصاف کی فراہمی تک چین سے نہیں بیٹھوں گا، پنجاب حکومت اور پوری قوم متاثرہ خاندان کے ساتھ ہے، متاثرہ خاتون کو فوری انصاف دلانا ریاست کی ذمہ داری ہے۔