اسلام ٹائمز - اسلام آباد، بھکاری مافیا کے سرپرست پولیس اہلکار نکلے

اسلام آباد، بھکاری مافیا کے سرپرست پولیس اہلکار نکلے

وفاقی دارالحکومت میں پولیس نے بھکاریوں کیخلاف آپریشن کے دوران آٹھ ٹھیکداروں کو گرفتار کرلیا ہے اور ان کی سرپرستی کرنے والے 8 پولیس اہلکار بھی پکڑے گئے ہیں۔ گرفتار پولیس اہلکاروں میں ایک اے ایس آئی، 2 ہیڈ کانسٹیبلز اور 5 کانسٹیبلز شامل ہیں تاہم ان کے نام اور ڈیوٹی کے تھانے کے متعلق کوئی معلومات فراہم نہیں کی گئی۔

اسلام ٹائمز۔ وفاقی دارالحکومت اسلام آباد میں بھکاری مافیا کے خلاف آپریشن کے دوران ایک بڑے اور منظم نیٹ ورک کو پکڑ لیا گیا ہے۔ ترجمان اسلام آباد پولیس کے مطابق وفاقی دارالحکومت میں پولیس نے بھکاریوں کیخلاف آپریشن کے دوران آٹھ ٹھیکداروں کو گرفتار کرلیا ہے اور ان کی سرپرستی کرنے والے 8 پولیس اہلکار بھی پکڑے گئے ہیں۔ گرفتار پولیس اہلکاروں میں ایک اے ایس آئی، 2 ہیڈ کانسٹیبلز اور 5 کانسٹیبلز شامل ہیں تاہم ان کے نام اور ڈیوٹی کے تھانے کے متعلق کوئی معلومات فراہم نہیں کی گئی۔ ٹھیکیدار بھیک مانگنے کی آڑ میں منشیات فروشی کا کام بھی کرتے تھے۔ ٹھیکیدار مختلف بستیوں اور جھگیوں سے پانچ سو روپے دیہاڑی پر بچے کرائے پر لیتے تھے اور انہوں نے آپس میں علاقے تقسیم کر رکھے تھے۔ گزشتہ ماہ بھی پولیس نے کریک ڈاؤن کرتے ہوئے 100 سے زائد پیشہ ور بھکاری گرفتار کیے تھے۔ اسلام آباد کے تمام ٹریفک سگنلز، مارکیٹس، چوراہوں سے گرفتار بھکاریوں کو مختلف تھانوں میں منتقل کیا گیا ہے۔ پولیس کا کہنا ہے کہ پیشہ ور بھکاریوں کی وجہ سے شہریوں کو پریشانی کا سامنا کرنا پڑتا ہے۔ بھکاریوں کے خلاف بھکاری ایکٹ کے تحت مقدمات درج کیے جا رہے ہیں اور ان کو اب شخصی ضمانتوں پر رہا نہیں کیا جائے گا بلکہ پیشہ ور بھکاریوں کے خلاف چالان مقامی عدالتوں میں پیش کیے جائیں گے۔ جرمانے ادا کرنے کے بعد یہ پیشہ ور بھکاری دوبارہ انہیں چوک چوراہوں پر نظر آتے ہیں۔ پولیس کا کہنا ہے کہ وفاقی دارالحکومت میں یہ بھکاری مختلف کچی آبادیوں میں رہائش پذیر ہیں، ان کو چلانے والے گروہ کو پکڑیں گے۔ بھکاریوں کے خلاف اس سے قبل بھی متعدد آپریشن کئے گئے لیکن وفاقی دارالحکومت میں بھکاریوں کی تعداد میں کمی نہیں آئی۔