QR CodeQR Code

کراچی، گھر سے مردہ حالت میں ملنے والی خاتون سرجن کے قتل کی تصدیق

18 Sep 2020 12:36

مقتولہ کے کلاس فیلو ڈاکٹر ہمایوں بشیر کی مدعیت میں قتل کا مقدمہ درج کرتے ہوئے مقتولہ کے ایک قریبی رشتے دار کو پوچھ گچھ کیلئے حراست میں لے لیا ہے اور جلد ہی قتل کی وجہ اور اس میں ملوث ملزمان کا سراغ لگا لیا جائیگا۔


اسلام ٹائمز۔ شہر قائد کے علاقے بہادرآباد میں گھر سے مردہ حالت میں ملنے والی خاتون سرجن کے قتل کی تصدیق ہوگئی، پولیس نے مقدمہ قتل کی دفعہ کے تحت درج کرکے مقتولہ کے قریبی رشتے دار کو پوچھ گچھ کیلئے حراست میں لے لیا۔ تفصیلات کے مطابق ایس ایچ او ماڈل تھانہ فیروز آباد انسپکٹر اورنگزیب خٹک نے بتایا کہ 4 ستمبر کو بہادرآباد کے علاقے شبیر آباد میں واقع بنگلے سے 60 سالہ خاتون ڈاکٹر امت اللہ شیخ دختر غلام عباس کپاڈیہ کی 2 روز پرانی لاش کمرے کے قالین سے ملی تھی۔ پوسٹ مارٹم رپورٹ آنے پر انکشاف ہوا کہ لیڈی ڈاکٹر امت اللہ شیخ کو گلا دبا کر قتل کیا گیا تھا، مقتولہ غیر شادی شدہ اور ایک ہزار گز کے بنگلے کی پہلی منزل پر تنہا رہائش پذیر تھیں، جبکہ گراؤنڈ فلور پر ان کی خالہ زاد بہن اپنے بیٹے کے ہمراہ رہائش پذیر ہیں۔

مقتولہ مختلف اسپتالوں میں بطور سرجن کام کرتی رہی ہیں اور جس مکان میں وہ رہائش پذیر تھیں، اس کے ساتھ والا ایک ہزار گز کا خالی پلاٹ بھی انہی کی ملکیت بتایا جاتا ہے، جبکہ اس کے علاوہ بھی ان کی جائیدادیں بتائی جاتی ہیں اور شبہ ہے کہ انھیں جائیداد کے تنازعے پر قتل کیا گیا ہے۔ اورنگزیب خٹک نے مزید بتایا کہ پولیس نے مقتولہ کے کلاس فیلو ڈاکٹر ہمایوں بشیر کی مدعیت میں قتل کا مقدمہ درج کرتے ہوئے مقتولہ کے ایک قریبی رشتے دار کو پوچھ گچھ کیلئے حراست میں لے لیا ہے اور جلد ہی قتل کی وجہ اور اس میں ملوث ملزمان کا سراغ لگا لیا جائیگا۔


خبر کا کوڈ: 886930

خبر کا ایڈریس :
https://www.islamtimes.org/ur/news/886930/کراچی-گھر-سے-مردہ-حالت-میں-ملنے-والی-خاتون-سرجن-کے-قتل-کی-تصدیق

اسلام ٹائمز
  https://www.islamtimes.org